ئەڤینا باژارییێ
قەهرەمان عبدوللا بەرواری
ڤی باژێری،
ئەز گوهارتم، تو گوهارتی
بزاڤا مە نەما بزاڤ
کرە گولەکا پڕی خوناڤ
تو بوویە باخ
ئەز بوومە تاخ
زارۆکێن ئەڤی باژێری
ریحانێن مە هەمی برن
بۆ پیاسەڤانێن جادا (شمک زەرا)،
کرن بویەمباغ
ئەفسانەیا ئەڤینا من
کەت شۆپا باژێرڤانییێ
ئەفەندیا لێ کر گولاڤ
کچینییا وێ کرە سویکا بویکان
ئەز و تو بووین عەرد و هەتاڤ
داڤێن ئەوێ پۆڕا شەڤین
بوون مژویلانک
بۆ چاڤێن ترافیکان
گەلەک جاران تووڕە دبن
زەر د بن، پاش سۆر سۆر دبن
من دراوەستینن
گەلەک جاران ڤیندار دبن
کەسک کەسک
گازی د کەن دلێ من باخە.. وەرە ناڤ
پەیڤێن تە یێن پڕی شەرمین
د بن ئێزگەھ
هەر رۆژ سپێدان خەبەردانا
پرت و بەلاڤ
چاڤێن تە یێن پڕی ئەڤین
د بنە سەد خاندنگەھ
هەر رۆژ سپێدان خاندەڤان لێ دکەن سلاڤ
لێڤێن تە یێن پڕی هنگڤین
د بنە مێرگێن شیریناهییێ
هەر رۆژ سپێدان ژێ دباریت
شەربەت سیلاڤ
دەستێن تە یێن پڕی نەرمین
د بنە سەد خەستەخانە
هەر رۆژ سپێدان دەرمان دکەن
دلێ منێ پڕی عەداڤ.
