ئەڤی گوندێ دھۆکێ ب تنێ مالەک لێ دژیت
ئەڤرۆ نیوز، نەوزاد زادە ھلوری:
گوندەکێ سەر ب ناحیا دینارتە ئەڤە چەندین سالە ب تنێ مالەک تێدا دژیت و مژولێ ب خودانکرنا تەرش و تەوالی یە ، و بو ئەڤرۆ نیوز ددەتن دیارکرن کو ھەتا مرنێ دێ لسەر گوندێ خوە بیت.
ژێدەرەکێ سەر ب ناحیا دینارتە بۆ ئەڤرۆ نیوز دیارکر کو بتنێ مالەک ل گوندێ ” شنیێ ” ھەیە و گۆت : ( ئەڤە چەندین سالە بتنێ مالەک ل گوندێ شنیێ یا سەر ب ناحیا دینارتەڤە دژیت و ئەڤە سەرەرای کو مالەک زەنگین و پێچێبویە و خودان چەندین دوکانایە ، و نھا ل گوندێ ناڤبری بێی کارەب و ئاڤا پاقژ دژیت و دیسان چوو رێکێن ھاتن و چوونێ ژی نینە).
ئەڤرۆ نیوز ب رێیا تێلەفونێ پەیوەندی ب وێ مالێ کر و سەرەرای پشتراستکرنا ئەڤێ ھەوالێ بۆ ئەڤرۆ نیوز گۆت : (بەلێ ئەڤە خودێ ئەز ژدایک دای ھەتا نھا ئەز ل گوندێ خوە دژیم و ھەتا مرنێ ژی دێ ھەر مینم ل گوندێ خوە و نھا مژولێ ب خودانکرنا تەرش و کەوالی مە).
مەلا شنی زێدەتر گۆت : ( بەری چەند سالان گوندێ مە ژبەر سەدەما شەرێ نافخویێ پەکەکێ ھاتیە خرابکرن و خەلکی َگوندی بەر ب دەڤەرا بارزان و ئاکرێ و چەند جھەکێن دنڤە چوینە و رەوشا وان ژی ل وان جھان نەیا باشە و ئەوان ژی چوو جە و خانوو نین ژ بەرڤێ من ڤیا ھەر لگوندی بمینم).
ناڤبری د درێژاھیا ئاخفتنێ، خودا دیارکر کو ل گوندێ وی کارەبا گشتی و مالیدێ ھەردوان نینە و ئەڤە سەرەرای کو ئاڤ ژی نینە و گۆت : ( من بگورەکا بچوک کریە رۆژێ چەند دەمژمێرەکێن گەلەک کێم بو روناھیێ ل شەڤێ و راکێشانا ئاڤێ ل روبارێ زێ بچوک بکاردئینم ، و زاروکێن خوەژی فرێدکەمە گوندێ ھردان ل دەڤەرا بارزان بو قوتابخانێ بەلێ دناڤبەرا گوندێ مە و گوندێ ھەردان رووبار ھەیە و چونا وان بو قوتابخانێ گەلەک ب زەحمەتە).
ناڤبری ل دوماھیێ گۆت : ( بتنێ بوون ژیانەک گەلەک نەخوشە و دخوازین کو حکومەتا ھەرێمێ ھەڤکاریا وەلاتییێن گوندی بکەت بو ڤەگەریانا وان بو گوندی و دیسان پرۆژێن سەرەتایێن وەکو رێک و کارەب و پرۆژێ ئاڤێ و قوتابخانەیێ ل گوندی درۆست بکەت ژبەرکو ھەموو خەلکێ گوندی کو نھا وەکو ئاوارە ل چەند جھەکێن دن دژین چاڤەرێ ڤەگەریانێ دکەن).
