ئەڤە ئاماژەنە کو ھەڤژینێ تە ھێشتا حەز ژ تە دکەت
ئه‌ڤرۆ:
ئەو ئەڤینیە مە ھەردەک دھێلیتە د لێگەریانێ دا، مە ل سەر پەڕێن خوە دبەتە جیھانا خوە یا خۆش، بەلێ ئەو حەز ژ رۆتینێ ناکەت و ل بەرامبەری دلگرانیێ لاواز دبیت و پێدڤیە ھەمی دەمان گیانێ بھێتە ئاڤادان دا بەردەوام یا نوو بیت.
ئەڤجا چاوا پشتی بۆرینا چەند سالان ل سەر ئەڤینداریێ و کەتنە سەرئێکا خەم و پەرپرساتیان و وەستاین و گوھۆرینان، دێ چاوا شێین ڤێ ئەڤینیێ پارێزین و ھێلینە د وی وێنی جوانێ دەستپێکێ دا؟ ژن دێ ڤان پرسیاران ژ خوەکەت: ئەرێ ھەڤژینێ من ھێشتا حەز ژ من دکەت و شتی ڤی دەمی ھەمیێ ئەز دڤێم؟
بۆ بەرسڤا ڤێ پرسیارێ خانما ھێژا بلا بەرێ تە ل ڤان پێنج ئاماژان بیت و ھەکە ھەبن ئەو ھەڤژینێ تە ئەڤینیا خوە بۆ تە دوپات دکەت و تو دڤێی.
• بەردەوام یێ ل گەل تە بۆ بەرسینگگرتنا ھەمی ئاستەنگان:
زەلامێ ئەڤیندار و عاشق دێ بینی بەردەوام یێ ل بەر تەنشتا تە بۆ بەرسینگگرتنا ھەمی ئاریشە و ئاستەنگان، تە پشتگوە ناھاڤێژیت و ل سەر خاترا تە خوە ل بەر گەلەک تشتان گریت، ئەو پەناگەھا تە یە ھەکە تو ب خەم کەتی و نۆشدارێ تەیە ھەکە نەخۆش بووی.
• ھەمی دەمان تە ژ ژنێن دی جودا دبینیت:
زەلامێ ئەڤیندار ھەمی دەمان تە ب ھەمی تشتان ژ یێن دی جوداتر دبینیت و خو کێماسیێن تە ژی یێن ئەو حەز ژێ دکەت، دێ د چاڤێن وی دا مینی ژ ھەمیان باشتر و یێ ب تە رازیە و وەکو تو ھەی حەز ژ تە دکەت.
• تە وەکو ھەڤپشکا دل و گیان و ژیانا خوە دزانیت:
زەلامێ ئەڤیندار تە وەسا نابیت کو تو ھەلبژارتی دا ب تنێ ببیە کابانیا مالێ و دایکا زارۆیان، بەلکو تە ب نیڤا خوە یا دویێ دزانیت و تمامکەرا ژیانا وی، ھەست پێدکەت تو ھەڤپشکا وی د ھەمی تشتان دا، ل نێزیکی تە ھەست ب ئێمناھیێ و گەرمێ دکەت، دلێ خوە بۆ تە ڤەدکەت و تە وەکو پەناگەھەک بۆ نەخۆشی و خەمان و ھەڤپشکا کەیف و سەرکەفتنانا دبینیت.
• چ دەمێ تو داخواز بکەی دێ بینی:
ھەمی دەمان یێ بەرھەڤە، دەمێ تو داخواز دکەی دێ بینی، دەمێ تو پێدڤی دبیێ یێ بەرھەڤە ھاریکاریا تە بکەت و گوھداریا تە بکەت. د ناڤ قەرەبالغا کاری دا دێ دەمەکی بۆ تە تەرخان کەت بلا چەند دەمێ ویێ کێم بیت، نامە و تەلەفۆنێن تە پشتگوە ناھاڤێژیت و تو ل بەراھیا ھەمی تشتان دھێی د ژیانا وی دا.
بزاڤێ دکەت ل سەر خاترا تە خوە بگوھۆریت:
دبیت ژن پتر یا نەرم بیت و پتر یا بەرھەڤ بیت بۆ گوھۆرینێ بتایبەت ھەکە یا ئەڤیندار بیت، بەلێ زەلامێ ئەڤیندار دێ دێ خوە وەستینیت دا ھندەک ژ تا و تبعەت و ساخلەتێن خوە بگوھۆریت یێن تو حەز ژێ نەکەی، دا بۆ تە دوپات کەت کو حەز ژ تە دکەت. دێ ل گەل تە ھێت بازاری سەرەرای کو حەز ژ بازاری ناکەت، دبیت ستایلێ خوە ژی بگوھۆریت دا تە رازی بکەت.
