ئەڤە ١٦ سالە ل گەل تەرمێ هەڤژینا خوە دژیت
ئەڤرۆ نیوز:
د روودانەکا سەیر دا ل جیهانێ، زەلامەکێ ڤێتنامی ژبەر خەمێن ژ دەستدانا هەڤژینا خوە، هەتا نوکە خەمێن مرنا وێ ژبیرا وی ناچن، لەوما وی تەرمێ وێ کریە د ناڤ پەیکەرەکێ پلاستەری دا و ئەڤە ١٦ سالە ل سەر جهێ خوە یێ نڤستنێ دانایە.
میدیایێن ڤێتنامێ دیار کریە، کو وەلاتیەک ب ناڤێ لێ ڤان ئەڤە دەمێ ١٦ سالانە ل گەل تەرمێ هەڤژینا خوە یا مری دا، دەمێن خوە دبورینیت و ل سەر جهێ خوە یێ نڤستنێ دانایە و ل گەل دا دنڤیت، ڤێ چەندێ دەنگڤەدانەکا مەزن د میدیایێن جیهانێ دا پەیداکریە.
ئەڤ وەلاتیە ئاکنجیێ پارێزگەها کوانگ ناما ڤێتنامێ یە، هەر چەندە خەلکێ وێ دەڤەرێ دلگرانیا خوە ل سەر شێوازێ ژیانا وی نیشاندایە، لێ ئەو نەشێت دەستان ژ وێ ژیانا خوە بەردەت و دەستهەلاتدارێن وێ دەڤەرێ ژی ژ روویێ قانوونی ڤە نەشێن چ رێکاران بگرنە بەر.
مالپەرێ ئۆدیتی سێنترال بەلاڤە کریە، دەستپێکا ڤێ چیرۆکێ ب ڤی ڕەنگی بوویە، کو ل سالا ٢٠٠٣ دەمێ هەڤژینا وی مری، لێ ڤان بۆ دەمێ ٢٠ هەیڤان ل سەر گوڕێ وێ دنڤست، لێ ژبەر دژواریا باران و سەڕمایێ بڕیار دا ب لێدانا تونێلەکێ بچیتە بن گوڕێ هەڤژینا خوە و ل گەل دا بمینیت، لێ پشتی کو زارۆکێن وی ڕێگری لێکری، وی ژی بڕیار دا تەرمێ وێ ل گەل خوە دا بینیتە مال و نوکە ل گەل تەرمێ وێ ژیانا خوە دبورینیت.