ئەڤ جارە دێ كامیرە لسەر ئامیرێ هووربینیێ بۆ خواندنا سەروچاڤان ل شوونا پەنجەمۆرێ هێتە زێدەكرن
سندس سالح سلێڤانەیی:
رێڤەبەرێ كۆمسیۆنا بلندا هەلبژلرتنان ئۆفیسا پارێزگەها دهۆكێ د دیدارەكا تایبەتدا بۆ رۆژنامەیا ئەڤرۆ دیار كر، وان وەك كۆمسیۆن بەرهەڤیەكا باش بۆ ئەنجامدانا هەلبژارتنێن جڤاتا نوونەرێن ئیراقێ كریە كو بڕیارە ل هەیڤا یازدە یا ئەڤ سالە بهێنە گێڕان و كارێ وان ب رەنگەكێ ئاسایی ب رێڤە دچیت و ب گۆتنا وی خەلكێ دهۆكێ یێ هشیارە و وەكو هەرجار هەست ب گرنگی و بەرپرسیارەتیا هەلبژارتنان دكەن و ئەو پێشبینی دكەن پارێزگەها دهۆكێ رێژەیا ئێكێ یا پشكداریێ ل ئاستێ هەرێمێ و ئیراقێ بیت.
خالد عەباس، رێڤەبەرێ كۆمسیۆنا بلندا هەلبژلرتنان ئۆفیسا پارێزگەها دهۆكێ بۆ رۆژنامەیا ئەڤرۆ گۆت: ئەم وەك ئۆفیسا دهۆك یا هەلبژارتنان ل سەر هەموو ئاستان یێ بەرهەڤیان دكەین و هەموو كار ب باشی برێڤەدچیت، بۆ نموونە نوكە ئەم یێ د قوناغا مەشق و راهێنانا كارمەندێن ئۆفیسێ ل سەر بكارئینانا ئامیرەیێن هەلبژارتنان و ل حەفتیێن بهێت دێ كارمەندێن مە یێن بنگەهان هەمان خۆل وەرگرن، هەروەسا دابەشكرنا كارتێن دەنگدانێ ب رێكا 41 بنگەهان یا بەردەوامە، دیسان هەوا هشیاركرنێ ژی بەردەوامە.
زێدەتر گۆت: ل مەها بۆری هەتا نوكە مە شەش كوربەندێن هشیاركرنێ ئەنجام دان دگەل شەش تەخ و چینێن كرنگ وەكی (لایەنێن سیاسی، ماموستایێن ئاینی، لاو و ئافرەت، پێكهاتە وخودان پێدڤیێن تایبەت، ئەكادیمیست، هەروەسا راگەهاندن ومیدیكار)، ژلایەكێ دیڤە كوگەهـ دهێنە بەرهەڤكرن بۆ وەرگرتنا كەرەستێن هەلبژارتنان، دیسان نوكە پێشكێشكرن بۆ كاركرنێ وەك كارمەندێ رۆژا دەنگدانێ بەردەوامە هەتا 1/8/2025، ل قوناغێن بۆری ژی نووكرنا تۆمارا دەنگدەران و پێشكێشكرنا لیستێن بەربژێران ب سەركەفتی بریڤەچوون، بۆ زانین دەنگدەرێن گشتی 944 هزارن، لێ یێن بایۆمەتری تۆماركری نیزیكی 780 هزارانە، رەنگە ئەڤ ژمارە بهێنە گۆهۆڕیین ژبەر ئەو حالەتێن مە د قوناغا نووكرنا تۆمارا دەنگدەران تۆماركرین، هەروەسا مە نێزیكی 34 هزار ئاوارە هەنە كو دێ دەنگێ خۆ دناڤ كەمپا یان دەرڤە ل دهۆكێ دەن.
دەربارەی هژمارا بنگەهێن دەگدانێ (خالد عەباس) گۆت: پێشتر سالا 2024 مە 264 بنگەهێن دەگدانا گشتی هەبوون، لێ ئەڤ جارە مە داخوازكریە ژمارە زێدە بیت، لێ هێشتا بریارا لسەر نەهاتیە دان و ل ڕۆژا هەلبژارتنان نیزیكی 10 هزارا كەسان وەك كارمەندێن رۆژا دەنگدانێ دێ وەرگرین، پشتی تیروپشك دهێتە كرن، ناڤێن سەركەفتیان دێ هێنە راگەهاندن و پاشی دێ مەشق و راهێنان پێ هێـتەكرن.
خویاژی كر، بۆ زانین ناڤێن كەسێن وەغەركری ژ لیستێ هاتینە دەر د قوناغا نووكرنا تۆمارا دەنگدەران دا هەر كەسێ سەرەدانا مە كربیت بو ژێبرنا ناڤێ مریێ وان هاتیەكرن، لێ ئەگەر سەرەدان ژی نەكربیت دیسان چ كارتیكرنێ ل كارێ مە و دەسپاكیا هەلبژارتنان ناكەت، چونكی كەس نەشێت ل جهێ مری دەنگێ خۆ بدەت، ژبەر كو پەنجەمۆر دهێـتە وەرگرتن و كارتا بایۆمەتری ب تنێ دهێتە بكارئینان، لەوما ب هیچ رێیەكێ دەلیڤا سەختەكاریێ نینە، ئەم پشت راستین ژ كار و پێرابونێن خوە، مە گەلەك فلتەر هەنە كو رێكێ ل تەزویرێ دگرن، وەكی كارتا بایۆمەتری و پەنجەمۆر و ئامیرێن ئەلكترونی و تۆمارا دەنگدەران و هەڤبەركرنا سێ جاری و هەبوونا بریكار و چاڤدێران ل هەموو بنگەهان.
دەربارەی ئاستەنگێن دكەڤنە هەبەر كارێ وان دا گۆت: مە چو ئاستەنگێن وەسا نینن، هەموو كارێ مە ل دووڤ پلانا كۆمسیونێ برێڤەدچیت، جار بۆ جارێ كومسیون ل سەر كێماسی و ئاستەنگا دراوەستین و باشتر كاردكەت و دەزگەهێن ئێمناهیێ گەلەك دگەل مە د هاریكارن.
ل دووماهیێ گۆت: ل دووڤ یاسایا ژمارە 4 یا سالا 2023 پێدڤییە د 24 دەمژمێران دا ئەنجامێن بەراهیێ بهێنە راگەهاندن، پاشی پشتی ئێكلابوونا سكالایان د ماوەیەكێ كورت دا ئەنجامێن دووماهیێ دهێنە راگەهاندن و گۆت: ئەو ئاریشێن هەلبژارتنێن چووی چارەسەر بووینە و ئەم دشیێن بێژین پێشتر ژی مە چ ئاریشێن وەسا مەزن نەبوون، ژبلی نەخواندنا هندەك پەنجەمۆران كو ئەم نەچاربووین ل دووڤ یاسایێ كو نابیتە ژ 5% بۆریت، لێ بۆ ئەڤێ هەلبژارتنێ دێ كامیرە لسەر ئامیرێ هویربینێ هێتە زێدەكرن بۆ خواندنا سەروچاڤا ل شوینا پەنجەمۆرێ، واتا ئاریشا پەنجەمۆرا هەتا رادەیەكێ مەزن دێ هێتە چارەسەركرن.
