(ئەڤ جەریدا منا ها یا عەولییە)
سەیفوللا موحەمەد
چ پێنەڤێت، بەرێ بنیاتی یێ ڕۆژنامەڤانییا كوردی ل ٢٢ نیسانا ١٨٩٨، ل سەر دەستێ ( میقداد مەدحەت )، ل قاهیرە پایتەختێ مسرێ هاتە دەینان، ئەو كەسایەتییێ ژ بنەمالەكا خەباتكەر و شۆڕەشگێر، بنەمالا بەدرخانییان، كو قەلەمێ خوە كری كەلەمێ چاڤێ دوژمنان، ئەو ژی ب دەرخستنا ڕۆژنامەیا (كوردستان)، یا دایك. ب ڕاستی كارەكێ ب ڤی ڕەنگی ڕەنجەك مەزن دڤییا و نە یێ ئاسان بوو، چ وەك دەرخستنا ڕۆژنامەیێ و چ ڤەگوهاستن و گەهاندنا وێ بۆ بەردەستێ خواندەڤانان، نەخاسمە د وان كاودانێن دەربەردەرییێ دا، لێ میرێ ڕۆژنامەڤانان ئەڤ ئەركێ قورس و گران ب ستویێ خوەڤە گرت. ئەگەر ل ڕۆپەلێن ژمارە ( ١ ) یا ڕۆژنامەیا ( كوردستان) بنێرین، دێ بینین كو (میقداد) وەكو نۆژدارەكێ تایبەتمەند دەستێ خوە دەینایە سەر برینێ و دەردێ گەلێ كورد یێ كو ژبەر د نال، باش دەستنیشان دكر، ئەو ژی نە خواندن و بێ بەهربوونا مللەتی بوو ژ زانست و زانینێ، لەوا گازییا خوە دگەهینت هەمی چین و تویژان و ب تایبەت زانایێن ئایینی كو بەرێ زاڕۆكان بدەن خواندنێ و ب زانینێ چەكدار بن، داكو خوە وەكو مللەت ناس بكەن و هشیارییا نەتەوی د ناڤدا بەلاڤ ببیت و دۆست و دوژمنان ژ هەڤ جودا بكەن. هەر چەندە میر میقداد یێ دەستهەل بوو بۆ زمانی و نڤێسینێ و گەهاندنا پەیاما خوە، لێ د گەل هندێ باوەری ب جوداهییا دیتن و بۆچوونێن بەرانبەر هەبی، ئانكو ب سینگەك بەرفرەهـ و ب جورئەت ڕەخنە قەبوول دكر، كو ل ڤی سەردەمی كێم كەسان ئەو وێرەكی هەبیت و ل سەر خوە قەبوول بكەت، ئەو ژی دەمێ دبێژیت : ئەڤ جەریدا منا ها یا عەولییە، لەوا وێ گەلەك كێماسی هەبن، ئەز هیڤی دكم كێمییا جەریدەیێ ژ منڕە بنڤیسن، هەمو تشت وەكو نوو چێدبن كێمن، پاش هینگێ د كەڤە ڕێدە. ئەم دبێژین د سالڤەگەڕا(127) سالییا ڕۆژنامەڤانییا كوردی دا، میرێ شۆڕەشڤان و ڕۆژنامەڤان ل بیر دئینین و دبێژین میرێ خوە، پەیاما تە گەهشت و هەتا هەتا شانازییێ ب تە و خەبات و خامەیێ تە دبین، ل سایا خامەیێ تە ئەڤرۆ ب هزاران ڕۆژنامە ل سەر شۆپا ڕۆژنامەیا (كوردستان) دمەشن و بەردەوامی ب خەباتا ڕۆژنامەڤانی ددەن. سلاڤ ل بیرەوەرییا ( 127) سالییا ژ دایكبوونا ڕۆژنامەیا (كوردستان) و خودانێ وێ (میقداد مەدحەت بەدرخان) و هەمی ڕۆژنامەڤانێن كوردستانێ.
