ئەڤ سالە بەرهەمێ برنجێ كوردی ل ئاكرێ دێ گەهیتە 10 هزار تەنان
ئاكرێ، رەمەزان زەكەریا:
ل سنوورێ دەڤەرداریا ئاكرێ رێژەكا باش برنجێ كوردی هاتیە چاندن و سالانە ئەڤ رێژە زێدە دبیت و پێشبینی دهێتە كرن ئەڤ سالە رێژا بەرهەمێ برنجی بگەهیتە دەهـ هزار تەنان.
محەمەد عەبدوللا، جوتیارەكێ دەڤەرا ئاكرێیە بۆ ئەڤرۆ گۆت: سالانە رێژا چاندن و بەرهەمئینانا برنجێ كوردی زێدە دبیت، ژبەركو برنجێ ئاكرێ تایبەتمەندیا خۆ هەیە د بازاری دا و ڤێ چەندێ وەكریە جوتیار پتر گرنگیێ بدەنە چاندن و بەرهەمئینانێ، ئەڤ سالە برنج گەلەك باش بوو و پێشبینی دكەین بەرهەمەكێ باش هەبیت.
ئەندازیار فازل مستەفا، رێڤەبەرێ چاندنا ئاكرێ بۆ ئەڤرۆ گۆت: ئەڤ سالە بەرهەمێ برنجێ كوردی زۆرێ باشە، بەرهەمێ سالێ كەفتیە بازاری و خواستەكا زۆر ل سەر هەیە، داخوازیەكا زۆر ل سەر هەیە و پتری پار سال برنج هاتیە چاندن و شیانێن هناردەكرنا برنجی هەنە و برنجێ خۆمالی گەهشتیە بازارێ ئەوروپا و ئەمریكا.
ناڤبری گۆت ژی: ل سنوورێ ئاكرێ 10 هزار دۆنەم برنج هاتینە چاندن و دهێتە پێشبینی كرن 10 هزار تەن بەرهەمێ برنجێ كوردی ل ئاكرێ هەبن، ئەڤ سالە پتری هەموو سالا خواست ل سەر هەیە، ژ بەر كو ئاخ و ئاڤا ئاكرێ بۆ كەرتێ چاندنێ ب گشتی و برنجی ب تایبەتی گەلەك یا باشە و جوتیار ژی ب باشی دچینن.
