ئەڤ سالە توندوتیژیا هەمبەر زەلامان زێدە بوویە
هەولێر، قائید میرۆ:
بورهان عەلی، سەرۆكێ ئێكەتیا زەلامێن كوردستانێ بۆ رۆژناما ئەڤرۆ دیار كر، ل دەستپێكا ئەڤ سالە هەتا نیڤا هەیڤا نیسانێ ل سەرانسەری هەرێما كوردستانێ 148 سكالایێن جودا یێن ئەنجامدانا توندوتیژیا دژی زەلامان هاتینە تۆمار كرن، لڤێ هژمارێ ژی 13 زەلامان دووماهی ب ژیانا خۆ ئینایە و دو زەلام ژی هاتینە كوشتن و گۆت: (چار هەیڤێن دەستپێكا ئەڤ سالە هەكە بهێنە هەڤبەر كرن ل گەل چار هەیڤێن دەستپێكێ یێن سالا بۆری رێژەیا توندوتیژیا دژی زەلامان زێدە بوویە، هەرچەندە هەتا نوكە جورێن توندوتیژیا ئەڤ سالە هاتینە كرن نەهاتینە ڤاڤارتن كا زێدەتر چو جورە توندوتیژیەك هاتیە ئەنجامدان).
بورهان دا زانین ژی كو دیاردەكا دی ل هەرێما كوردستانێ پەیدا بوویە و سالانە چەندین سكالا دهێنە تۆمار كرن ژلایێ زەلامانڤە ئەو ژی دەرخستنا زەلامانە ژ مال، بتایبەتی زەلامێن دانعەمر زێدەتر دهێنە دەرخستن ژ مالێن وان و گۆت: (ل دەمێ پەیدابوونا ئاریشەیا خێزانی ژی زارۆك زێدەتر دبنە لایەنگرێن دایكێ و پشتەڤانیا دایكا خۆ دكەن نەك بابێ، ئەڤەژی بوویە ئەگەر هەر سال چەندین زەلام مالێن خۆ بهێلن و دەركەڤن ژ مال).
سەرۆكێ ئێكەتیا زەلامێن كوردستانێ گۆتژی: (نها گۆهۆڕینەكا نێگەتیڤ پەیدا پەیدا بویە ئەو ژی ل سالێن بۆری ل دەمێ ئاریشەیەكا خێزانی دناڤبەرا هەڤژینان دا پەیدا دبو كەس و كارێن هەڤژینان بزاڤێن چارەسەركرنێ دكر و هەموو بزاڤەك دكر ئاریشە بهێتە چارەسەركرن، بەلێ نوكە بەرۆڤاژی دەمێ ئاریشەك دناڤبەرا هەڤژینان دا پەیدا دبیت هەڤژین ئێكسەر ئاریشێ دبەنە هەمبەر دادگەهێ و هەڤژین جودا دبن).
بورهان عەلی د بەردەوامیا ئاخفتنێن خودا دیار ك ركو ل دەمێ پەیدابوونا ئاریشەیان و شەڕی هەر تشتەكێ بەردەستێ ژنان بكەڤیت هەمبەری زەلامی دهێتە بكارئینان و ژن ل دەلیڤێ دگەڕن دەمێ ب شەڕ دچن ل گەل زەلامی و تشتێ بەردەستێ وان بكەڤیت دێ هاڤێژنە زەلامی، بەلێ زۆربەیا ئەو زەلامێن دهێنە دەركرن ژلایێ هەڤژینێن وانڤە ڤلە و باغ هەنە و دناڤدا دژین و گۆت: (ل ڤان سالێن دووماهیێ دیاردەكا دی ل هەرێما كوردستانێ پەیدا بوویە و زۆر جاران ژی بۆ رۆژنا ئەڤرۆ مە بەحس كریە، ئەوژی ڤەگوهاستنا مولكێ زەلامیە بۆ سەر ناڤێ ژنێ، نوكە ژن فێر بووینە داخوازێ ژ هەڤژینێ خۆ دكەن هەر ملك و مالەك هەبیت وەكی خانی و ئەرد و تڕۆمبێل ڤەگوهێزن بۆ سەر ناڤێ وان، مخابن هندەك ژن ب پیلان ئەڤی كاری دكەن و پشتی ڤەگوهاستنا ملكی داخوازا جودانێ و تەلاقی دكەن، زەلام ژی وی دەمی نەشێت ژلایێ قانوونی ڤە وەكی پێدڤی بەڕەڤانیێ ژ خو بكەت).
