ئەڤ سالە دێ ئەلبۆما خوە یا ئێکێ بەلاڤ کەت
ئەڤرۆ، زنار تۆڤی:
خانما سترانبێژ دیلەک ئاڤشار، خەلکا ئەردەھانێ یە ل باکورێ کوردستانێ و ئەڤە چەندین سالە ل باژێرێ ئیستەنبۆلێ دژیت، د دیدارەکێ دا بۆ رۆژناما ئەڤرۆ دیار کر: ئەڤە دەمێ پێنج سالانە ئەو ستران دبێژیت و مالباتا وێ گەلەک پشتەڤانیێ ل کارێ وێ دکەن، ھەتا نوکە وێ ١٢ سترانێن سینگل چێکرینە و ھەموو ژی کلیپ کرینە و دو ژ وان سترانان ژ پەیڤ و ئاوازێن وێ ب خوەنە، ھەتا نوکە وێ چو ئەلبۆم چێنەکرینە و وێ لبەرە ئەڤ سالە ئەلبۆمەکێ ژی بەلاڤ بکەت.
ناڤھاتیێ گۆت ژی: ئەو د ژیێ ٢٨ سالییێ دایە و بەری شەش سالان ھەڤژینێ وێ وەغەرکریە و وێ دو زارۆیێن کچ ژی ھەنە، ھەروەسا ئەو دچیتە ئاھەنگ و ھەلکەفتێن کوردان ل پرانیا باژێرێن کوردان ل باکوورێ کوردستانێ، نوکە ژی ئەو بەرھەڤیان بۆ تۆمارکرنا سترانەکا نوو دکەت، کو وێ ئەو سترانە ب شێوێ پۆتبۆری چێکریە، ئەو سترانە ژی ھەموو فولکلۆرن و ب شێوێ سترانێن گۆڤەندی چێکریە و ل ڤان نێزیکان دێ کلیپ کەت و بەلاڤ کەت.
دیلەکێ ئەو ژی گۆت: ئەز سترانان ب کوردی دبێژم و ھندی د ژیانێ دا مابم دێ خزمەتا ھونەرێ کوردی کەم، ھەر چەندە دەولەتا تورک رێگریێ ل کارێن مە یێن ھونەری دکەت، ئەم نەشێین سترانێن سیاسی یێن کوردی بێژین و سانسۆر ل سەر ستران و مۆزیکا کوردی ھەیە و ئەم نەشێین ناڤێ کوردستانێ دناڤا سترانان دا بێژین، سەرەرایی ڤێ چەندێ، ئەم بەردەوامیێ ددەینە ھونەرێ خوە.
