ئەڤ سالە دێ بەرهەمێ ئاژەلی بۆ بازاڕێن جیهانێ هێتە هنارتن
هەولێر، قائید میرۆ
بەرپرسەكا وەزارەتا چاندنێ راگەهاند، هەردو وەزارەتێن چاندنا هەرێما كوردستانێ و ئیراقێ ل سەر ئینانا بەرهەمێن بیانی گەهشتینە رێكەفتنێ و بڕیارە ل دۆر بەرهەمێ ئاژەلی ژی بگەهنە رێكەفتنێ و گۆت: نوكە كار بۆ پلانا ئەڤ سالە دهێتەكرن بۆ هنارتنا بەرهەمێ كوردستانێ و ژبلی بەرهەمێن چاندنێ بەرهەمێن ئاژەلی ژی دێ هێنە هنارتن بۆ بازاڕێن جیهانێ.
دكتۆر زێدا كەریم، رێڤەبەرا گشتی یا پلاندانانێ ل وەزارەتا چاندنێ بۆ رۆژناما ئەڤرۆ دیار كر «وەزارەتا چاندنێ نوكە مژوولی بەرهەڤكرنا رۆژمێرا چاندنێ یە و سالانە ل گۆرەی رۆژمێرا چاندنێ سەرەدەری دگەل بەرهەمێ ناڤخۆ یێ بیانی دهێتەكرن ل گۆرەی رۆژمێرا چاندنێ و هەر دەمێ بەرهەمێ چاندنێ ڤێڕا گەهشت و پێدڤیێن بازاڕی ب بەرهەمێ بیانی نەمان، ئەڤە دێ بەرهەمێ بیانی هێتە قەدەغەكرن.
زێدەتر گۆت: د دەمێ نوكەدا مە بڕیار دایە ئینانا باجان سۆركا بهێتە قەدەغەكرن، چونكو بەرهەمێ باجانێن باشوورێ ئیراقێ بەهرا بازاڕێن هەرێم و ئیراقێ هەنە و وەزارەتا چاندنا هەرێما كوردستانێ ژی بڕیار دایە ئینانا باجانان بهێتە قەدەغەكرن، چونكو هەردو وەزارەتێن چاندنێ رێكەفتن هەیە و ل هەیڤا تەباخا سالا بۆری شاندێ هەرێما كوردستانێ سەرەدانا بەغدا كربوو و گەهشتینە رێكەفتنێ ل دۆر ئینان و قەدەغەكرنا بەرهەمێن بیانی و ل تنێ مایە ل دۆر بەرهەمێن ئاژەلی بگەهینە رێككەفتنێ، واتە ئەگەر بەرهەمەكێ چاندنێ ل هەرێما كوردستانێ هەبیت و بەهرا بازاڕی بكەت هەرێم و بەغدا دێ د هەمبەردا پێكڤە ڤی بەرهەمی ل دەرڤە قەدەغە كەین، ئەڤە ژی پێنگاڤەكا گرنگە بۆ كەرتێ چاندنێ و هەبوونا هەماهەنگیێ یا گرنگە دناڤبەرا هەردولایان دا.
دكتۆر زێدا كەریم گۆت ژی «ل گۆرەی بڕیارەكا حوكمەتا فیدڕال ناڤێن جوتیارێن هەرێما كوردستانێ هاتینە تۆماركرن و بڕیارە هەموو ناڤێن هاتینە تۆماركرن ل چەند رۆژێن داهاتی بهێنە هنارتن بۆ بەغدا، هەتا بكەڤنە دناڤا پلانا ئەڤ سالە دا بۆ وەرگرتنا بەرهەمێ گەنمی و هەر جوتیارەكێ ناڤێ خۆ تۆمار نەكربیت، نەشێت بەرهەمێ گەنمی رادەستی سایلۆیێ بكەت، چونكە میكانزمەك هاتیە دانان و ناڤێن جوتیاران هاتینە تۆماركرن.
رێڤەبەرا گشتی یا پلاندانانێ ل وەزارەتا چاندنێ خویا كر، ئەم یێ كار دكەین بۆ ئەڤ سالە بەرهەمێ ئاژەلی بۆ بازاڕێن دەرڤە ب هنێرین، ل سالا بۆری ئەم شیاینە ب چاڤدێریا نڤیسینگەها سەرۆكێ حوكمەتێ بەرهەمێن چاندنێ وەكی هنگڤین و هنار و سێڤێن بەرواریا بگەهینینە بازاڕێن جیهانێ و بۆ ئەڤ سالە دێ هنارتنا وان بەرهەمێن چاندنێ د بەردەوامبیت، بەلێ ئەم یێ كار دكەین بەرهەمێ ئاژەلی ژی بچیتە دەرڤە و بازاڕ بۆ بهێنە ڤەدیتن، هەتا نافخۆیا هەرێما كوردستانێ دێ كار كەین بازاڕی پەیداكەین و سالا بۆری ل كارفۆر بەرهەمێ هنگڤینێ هەرێما كوردستانێ ب شێوەیەكی زۆر جوان هاتبوو دانان و فرۆتن، ئەم وەكی حوكمەت بەرهەڤین هەموو رێكەكێ بگرینە بەر هەتا جوتیارێن مە بازاڕ هەبیت بۆ بەرهەمێن وان.
