ئەڤ سالە ل دهۆكێ و زاخۆ شوقە بۆ مالباتێن شەهیدان دێ هێنە ئاڤاكـرن
هەولێر، قائید میرۆ:
بریكارێ وەزارەتا شەهید و ئەنفالكریان ئاشكرا كر، ئەڤ سالە ل دهۆكێ و زاخۆ شوقە بۆ كەسوكارێن شەهیدان دێ هێنە ئاڤاكرن و دبێژیت: هەر مالباتەكا شەهیدی و زیندانیێن سیاسی رازیبوون هەبیت، ژ وەرگرتنا پارچەیێن ئەردی ژی دێ مفاداربیت.
دكتۆر ناڤسەر نووری عەبدال، بریكارێ وەزارەتا شەهید و ئەنفالكریان بۆ رۆژناما ئەڤرۆ دیاركر، سالا بۆری ل هەولێر و سۆران، ل دهۆكێ ژی هندەك شوقە ل سەر مالباتێن شەهیدان هاتینە بەلاڤكرن و گۆت: «بڕیارە ئەڤ سالە ل ئیدارەیا سەربخۆ یا زاخۆ ل پارێزگەها دهۆكێ ژی شوقە بهێنە ئاڤاكرن و ل سەر مالباتێن شەهیدان بهێنە بەلاڤكرن، ل گورەی بڕیارا حوكمەتا هەرێما كوردستانێ دێ ئاڤاكرنا شوقەیان و بەلاڤكرنا پارچەیێن ئەردی هەموو مالباتێن شەهیدان ڤەگریت».
دكتۆر ناڤسەر گۆتژی: «هەر خێزانەكا شەهیدی و زیندانیێن سیاسی بڕیارا رازیبوونا وەرگرتنا پارچەیێن ئەردی هەبیت، دێ وەرگریت، هەتا نوكە بهزاران خێزانێن شەهید و ئەنفالكریان و زیندانیێن سیاسی پارچەیێن ئەردی وەرگرتینە و یێن مای ژی دێ وەرگرن».
