ئەڤ سالە نەورۆزا ئاكرێ باشتر و جوانتر و جوداتر دێ هێتە گێڕان
سەرۆكی باژێرڤانیا ئاكرێ راگەهاند، وەكو بەرهەڤی بۆ نەورۆزێ و سەرسالا كوردی، د نوكە دا هەژمارەكا كار و پڕۆژە، وەكو بەرهەڤی بۆ نەورۆزێ ل ئاكرێ دهێنە كرن.
بلند رزا، سەرۆكی باژێرڤانیا ئاكرێ گۆت: «ژ وان گورانكاریان چێكرن و بەرفرەهكرنا جهێ ئاهەنگ و هەلكرنا ئاگری و ئاهەنگا جەماوەری و یاریێن ئاگری یە ل سەرێ گری، كو جهەكێ گرنگ و بەرنیاس و ستراتیژیە ل ئاكرێ و سالانە ئاهەنگ ل وێرێ دهێنە كرن، بەری نوكە جهـ یێ تەنگ بوو و تێرا هەمیان وەكو پێدڤی نەدكر، ژ بەركو ئاكرێ جودا ژ دەڤەرێن دی پێشوازیێ ل نەورۆزی دكەت و خەلك ل هەمی دەڤەران قەستا ئاكرێ دكەت».
سەرۆكێ باژێرڤانیا ئاكرێ دیار كر، وەكو شەهرەزایی ب هەڤكاری ل گەل لایەنێن دی یێن گرێدایی ئاكرێ بۆ هندێ جوانتر پێشوازی ل نەورۆزێ بهێتە كرن، دەمێ نێزیكی مەهەكێیە د كاری دا و هەتا نەورۆزێ كار و پڕۆژە و بەرهەڤی دێ بەردەوام بن و گوت: «مە دڤێت ب جوانترین شێوە خزمەتا ئاكرێ و مێهڤان و نەورۆزڤانان بكەین، داكو دەمێ دهێنە ئاكرێ دەمەكێ خوش د ناڤ جوانی و سەقایێ ئاكرێ ببۆرینن».
وەكو نەریتەكێ سالانە، ب مەرەما راگرتنا باژێرێ ئاكرێ ب پایتەختێ نەورۆزێ، هەژمارەكا گورانكاریان ل ئاكرێ و وەكو بەرهەڤی بۆ نەورۆزێ دهێنە كرن.
ئاكرێ بۆ دەمێ چەندین سالانە ب رەنگەكێ جودا ب رووپیڤان و هەلگرتنا خەتیرێن ئاگری، ئاگرێ نەورۆزێ بۆ سەرێ كەلها ئاكرێ و كەلەكەڤنێ ب دەستێ كچ و كوران دهێنە برن، د ڤان سالێن دووماهیكێ ژی دا، د هەڤڕكییەكا بهێز دایە، بۆ هندێ، كو بەرەڤانیێ ژ ناسناڤێ پایتەختێ نەورۆزێ ل جیهانێ بكەت.
