ئەڤ سالە گەنم ل دووڤ تۆماركرنا ناڤێ جۆتیاران دێ هێتە وەرگرتن
رێڤەبەرا گشتیا پلاندانانێ ل وەزارەتا چاندنێ یا حوكمەتا هەرێمێ دیار كر، پرۆسا تۆماركرنا ناڤێن جۆتیارێن هەرێمێ بۆ هندێ یە بێخنە د ناڤا پلانا ئەڤ سالە دا، داكو گەنمێ وان ژێ بهێتە وەرگرتن و دبێژیت: د ڤان ڕۆژێن بهێن دا وان ناڤان دێ بۆ بەغدا هنێرین.
د. زێدا كەریم گۆت: «تۆماركرنا ناڤێن جۆتیاران، بۆ وێ چەندێ بوو، گەنمێ وان ئەڤ سالە بهێتە وەرگرتن و بڕیارە د ڤان ڕۆژێن بهێن دا ناڤێن جۆتیاران ڕادەستی حوكمەتا ئیراقێ بكەین، داكو ل دەمێ گەنمێ ئەڤ سالە دهێتە وەرگرتن مفادار بن و گەنمێ وان بهێتە وەرگرتن، هەروەسا داتایێن فەرمی ژ هەموو رێڤەبەریێن گشتی یێن چاندنێ دهێنە كۆمكرن و پشتی پێداچوونێ ژ لایێ وەزارەتا چاندنێ ڤە بۆ بەغدا دێ هێنە هنارتن».
گۆتژی: «ئەڤ سالە ل دووڤ تۆمارەكێ گەنم ژ جۆتیاران دێ هێتە وەرگرتن و هەر جۆتیارەكێ ناڤێ خوە تۆمار نەكربیت دێ بێ بەهربیت و گەنمێ وی ژێ ناهێتە وەرگرتن، چونكی پلان ب وی رەنگیە، كو ناڤێن جۆتیاران بهێنە تۆماركرن و پاشی بێخنە د ناڤ چارچۆڤێ پلانا ژێ وەرگرتنا گەنمی دا».
