ئەگەرێ پتریا ئاریشەیێن د ناڤبەرا هەڤژینان دا نە رەوشنبیریا سكسی یە
ئەڤرۆ
هەولێر، قائید میرۆ:
ڤەكۆلەرەكێ جڤاكی و شارەزا د بیاڤێ ئاشتكرنا خێزانێ ئاماژە پێ كر كو ئەو ئامارێن ژلایێ دادگەهێ ڤە لدۆر بەردانێ دهێنە بەلاڤكرن بتنێ ئەون یێن هاتینە ئێكلاكرن و بەردان یا بەر ب زێدەبوونێ دچیت و گۆت: ئەگەرێ سەرەكی یێ بەردانێ بۆ نەبوونا رەوشنبیریا سێكسی و هندەك ئاریشێن دی یێن دناڤبەرا هەڤژینان ڤەدگەڕیت.
ڤەكۆلەرێ جڤاكی سەردار لەتیف، شارەزا د بیاڤێ ئاشتكرنا خێزانێ بۆ رۆژناما ئەڤرۆ دیار كر، ل چەند رۆژێن بۆری دادگەهێ ئامارەك لدۆر رێژا بەردانێ بەلاڤكر و تێدا هژمارا وان خێزانێن جودا بووی هاتە راگەهاندن و گۆت: (بێگومان ئامارا هاتیە بەلاڤكرن تنێ ئەون یێن ل دادگەهێ ب دروستی جودا بووین و ئەو حالەتێن هێشتا نەهاتینە ئێكلا كرن تێدا نینن).
سەردار ئەو چەندە ژی دیار كر كو ئامارێن سالا 2022ێ ئەڤێ راستیێ دیار دكەن كو بەردان بەر ب زێدەبوونێ یە و سەدان هەڤژین هەنە ژلایێ روحی ڤە جودابووینە، لێ هێشتا ل دادگەهێ بڕیار ل سەر نەهاتیە دان و گۆت: (ئانكو ژن و مێر هەنە بتنێ ل لێناگەهێ پێكڤەنە و دناڤا ئێك خانی ڤە دژین، ئەڤجا هەكە خێزانەك ژلایێ روحیڤە جودا ببیت چو تام تێدا نامینیت و هندەك ژبەر خاترا زارۆكێن خوە پێكڤە ماینە و هندەكێن دیژی ژبەر بابەتێن جودا).
ڤەكۆلەرێ جڤاكی گۆتژی: (چەندین بادەك من دیتینە هەڤژین دبێژن ئەڤە زێدەتری ئێك سالە ئەم پێكڤە نە نڤستی و هەتا ژۆرێن وان یێن نڤستنێ ژی جودانە، حالەت ژی هەبووینە زەلام ئێك دینارێ نادەتە هەڤژینا خوە و دبێژتێ چاوا پەیدا دكەی ب كەیفا خۆبە، هندەك ژن ژی هەنە زەلامێن خوە ئازاد كرینە و گوتیێ هەرە چبكەی بكە تنێ مایێ خوە من نەكە، ئەو ئەگەرێن لدۆر بەردانێ ژلایێ دادگەهێ ڤە دهێنە ئاشكرا كرن تنێ ئەگەرێن لاوەكینە و دەمێ مرۆڤ ب هویری دچیتە دناڤا ئاریشێن هەڤژینان دیار دبیت چەندین ئاریشێن سەرەكی هەنە ژ وانژی نەبوونا رەوشنبیریا سێكسی و لەوانەیە زۆر جارا داخوازا زەلامی یا نە هەژی بیت و حەز و ئارەزویێن ژنێ ژی تشتەكێ دی بن).
سەردار لەتیف د بەردەوامیا ئاخفتنێن خوەدا دیار كر كو پێدڤیە زەلام بهێنە تێگەهاندن ئەو ڤیدیۆیێن ل مالپەڕێن پۆرن دهێنە بەلاڤكرن تشتەكێ واقعی نینە و هاتینە چێكرن بۆ مەرەمێن ماددی، لەوڕا ژی نابیت زەلام زۆریێ ل هەڤژینا خوە بكەت بۆ زارڤەكرنا وان ڤیدیۆیێن ل مالپەڕێن سێكسی دهێنە بەلاڤكرن و گۆت: (هەمان تشت بۆ ژنان ژی ئەو هەموو پەیوەندیێن ئەڤینی یێن دناڤا درامایێن بیانی دهێنە دیتن ئەڤە واقع نینە و بەرۆڤاژی بتنێ بۆ مەرەمێن ماددی هاتینە بەرهەڤكرن، هەتا دگەل رەوشت و تیتالێن جڤاكێ كوردی و شەریعەتێ ئیسلامێ ناگونجن، هەتا ژلایێ قانوونی ڤە سزا بۆ هاتیە دیار كرن و ب تاوان هاتیە تۆمار كرن).
شارەزایێ ئاشتكرنا خێزانێ گۆت: (ئەڤجا پێدڤیە ددەمێ هەبوونا هەر ئاریشەیەكێ یانژی دەمێ لێك تێنگەهشتن دناڤبەرا ژن و زەلامان پەیدا دبیت سەرەدانا جهێن پەیوەندیدار بكەن بۆ وەرگرتنا شیرەتان و بشێوەیەكێ ئاشتیانە و قانوونی دوماهیێ ب ئاریشێنن خوە بینن).
