ئەگەرێ سەرەکیێ خراب بکارئینانا تەکنۆلوجیایێ چیە؟
ئەڤرۆ نیوز:
دگەل پێشکەفتنا تەکنەلوژیایێ کوردستان ژی بێ بەھر نەبوویە و ب ئاوایەکێ بلەز تەکنۆلوجیا ھاتە دناڤ مە دا لەوما بکارئینانا ڤان ئامیران بۆ ئەگەرێ درۆستبۆنا ئاریشان دناڤ جڤاکی دا، ژبەرھندێ پێدڤی بۆ بەری ئەڤ ئامیرە بکەڤنە د دەستێ ھاولاتیان دا ھاتبانە ھشیار کرن لسەر چاوانیا بکارئینانێ، لێ ئەڤ چەندە ھاتە پشت گوە ھاڤێتن.
کاژین خوزندە تاھا کارمەندا ئاسایشا فروکخانا نێڤدەولەتی ل ھەولێرێ خۆیا کر، ئەڤ بابەتە زۆر گرنگـ و ھەستیارە، ژبەرکو ھاتنا تەکنەلوژیایێ و پێشکەفتنێ ب شێوەیەکێ بلەز بۆ ناڤ جڤاکێ مە ئەگەرەکێ سەرەکی یە بۆ ب کارئینانا خەلەت دناڤ خەلکێ مە دا و گۆت: ھەبوونا تێستێ پێش ئینانا ڤان ئامێران باشترە ژبەرکو ل ھەموو جیھانێ ھەر ئامێرەک وەک تێست دھێتە بکارئینان، لێ ئەگەرێ سەرەکی یێ ڤێ خەلەت بکارئینانێ لەزاتی بویە و ئەنجامێن نەراست زۆر جاران لێ دروست دبن بتایبەتی لنک توێژا گەنجان ئەڤجا چ رەگەزی َنێر بیت یان ژی مێ، لەوا دڤێت ھشیاری ھەبیت و بێنە ھشیار کرن و چەوانیا بکارئینانا ڤان ئامێران بزانن داکو ل پاشەرۆژێ توشی ئاریشا نەبن .
ئدریس بەشیر ماموستایە دیار کر، راستە ھەبونا ئامیرێن پەیوەندیێ کار ئەڤرۆکە ئاسان کریە بێ کو مرۆڤ خوە ماندی بکەت ئان ژی دەمێ خوە ببەت و گۆت: لێ بدیتنا من ھندەک بەرۆڤاژی د ڤان ئامیران دگەھن و ب خرابی بکار دئینن ئان ژی گەنجێ مە دبیت ژ دو سێ سیمکارتا پتر ھەبن بۆ نەخوشی و ئاریشان، لەوما دخوازین چاڤدێری ل سەر ھەبیت ژلایێ کومپانیا و حکومەتێ و حەتا مالێ ژی و خولێن ھشیارکرنێ بۆ گەنجان و تاکە کەسان بێنە ڤەکرن لسەر چاوانیا بکارئینانا ڤان ئامیرێن پەیوەندیێ ب ئاوایەک دروست و زانستیانە .
پارێزەر سامی سدقی بۆ رۆژناما ئەڤرۆ ئاشکرا کر، نھا تورێن جڤاکی و پەیوەندیان بوینە جھێ مفایەکێ ھەرە مەزن بو ھەموو جڤاکان لێ ھەموو کارا رویەکێ پوزەتیڤ و نێگەتیڤ ھەیە رویێ پوزەتیڤ جھێ دەستخوشیێ یە و رولێ نێگەتیڤ ژی یاسا دانەرێ کوردستانێ د رێکا یاسایەکا تایبەتدا ھەولا رێگریکرنێ ل ڤی رویەی کریە و ھەر خراب ب کارئینانەکا تورێن جڤاکی و پەیوەندیان ب گشتی سزایەک بو دەستنیشان کریە و گۆت: ئەو ژی لبن یاسایا ژمارە 6 یا سالا 2008 کو تێدا ھاتیە ھەر کەسەکێ ئامیرێن پەیوەندی پێ کرنێ ب گشتی و ب شێوەیەکێ خراپ بکار بینیت دێ ھێتە سزا دان کو سزایێ وی ژ سێ ھەیڤا کێمتر نەبیت و ژ پێنج سالا ژی پتر نەبیت یان ب کوژمەکێ پارەی دێ ھێتە سزا دان کو ژ 750 ھزارا کێمتر نەبیت و ژ پێنج ملیونا زێدەتر نەبیت، ئانکو ئێک ژ ڤان سزایانە یان زیندان کرنە یان ژی پارەیە و ئەڤە ژی تایبەتە ب وی کەسی ڤە وی جورێ سیمکارتی و ئەو ھێلێن کو ژلایێ کومپانیاڤە دھێنە بەلاڤکرن.
