ئەگەر باران نەهێن دێ نێزیكی ٤٠٠ ملیون دیناران زیان هەبن
هیلین سالم
بارانێن كێم و نەهاتنا بارانێ د دەمێ خۆ دا، كارتێكرنەكا خراب ل سەر ژیانا مرۆڤ و ئاژەل و رووەكان هەیە، ئەڤ دیاردە بوویە ئێك ژ مەزنترین كێشەیێن جیهانێ و كوردستانێ ب تایبەتی ل دەڤەرێن گەرم و جوتیارەك ژی دبێژیت: ئەگەر هەیڤا سێ و چار باران بهێن، بەلكی ٥٠ ژ سەدێ زیانا وان قەرەبوو ببیت.
ژ مەزنترین زیانێن نەهاتنا بارانێ، كێمبوونا ئاڤا ڤەخوارنێیە كو دبیتە ئەگەرێ كێشەیێن مەزن بۆ خەلكی، هەروەسا زیانەكا مەزن ب زەڤیێن چاندنێ دكەڤیت و بەرهەمێ وان كێم دبیت، ئەڤە ژی دبیتە سەدەما بلندبوونا بهایێ خوارنێ ل بازاران.
عەبدولا قادر سەرۆكێ رێكخراوا ئاڤ ل دهۆكێ بۆ رۆژناما ئەڤرو راگەهاند، پار هەتا هەیڤا ئێك ٢١٠ ملیمێن بارانێ ل دهۆكێ باری بوون، لێ ئەڤ سالە هەتا دووماهیا هەیڤا ئێك ب تنێ ٣٧ ملیمێن بارانێ بارینە.
دەربارەی هشكەسالیێ ژی ناڤبری گۆت: كوردستان ل سەر سێ زونا دەرباز بیت، زونەك دەڤەرا گەرمیانە و هەتا ١٥٠ ملیمێن بارانێ دبارن و زونا دووێ باژێر و زیر و گركن، نێزیكی ٤٠٠ ملیمێن بارانێ نە. زونا سیێ دبێژنێ زونا بارن بارینێن بەردەوام ٦٠٠ تا هزار ملیما باران دباریت. ئەگەر ژ ڤێ زونێ كێمتر باران باری، دێ هشكەسالی پەیدا بیت، لێ ب تنێ ل دهۆك و هەولێرێ ئەڤ سالە باران كێم بارینە، بەلێ ل دەڤەرێن سلێمانی و هەلبچە و كەركوكێ ژ پارسال پتر باران بارینە، لەوما نەشێین بێژین ئەم بەر ب هشكەسالیێ دچین.
گۆت ژی: گەلەك جوتیاران ب رێكا دەستكرد گەنمێ خۆ ئاڤدایە، بەلێ ئەگەر باران هاتن ب هیڤیا وێ چەندێ كو قەرەبوویا جوتیاران بهێتە كرن.
علی سەبری جوتیارەكێ باژێرێ دهۆكێ یە د دیدارەكێ دا بۆ رۆژناما ئەڤرۆ گۆت: وی نێزیكی دو هزار دونەمێن عەردی گەنم لێ چاندینە و بڕەكا زۆرا پارەی لێ مەزاختیە و ئەگەر باران نەهێن نێزیكی ٣٠٠ بۆ ٤٠٠ ملیون دینارا دێ زیان ڤێ كەڤن، گۆت ژی: ئەگەر هەیڤا سێ و چار باران بهێن، بەلكی ٥٠ ژ سەدێ زیانا وان قەرەبوو ببیت و ئەڤ بارانا ڤان دوو رۆژا دباریت چ مفای ل وان ناكەت، چونكی ئەڤ بارانە یا كێمە و تێرا گەنمی د ئاخێ دا ناچیت. وان هندەك زەڤیێن خۆ ب رێكێن دەستكرد ئاڤداینە، لێ چ مفایێ باش ناگەهیتە وان بەرامبەر وێ زیانا دێ هەبیت و هیڤی خواست خودایێ مەزن ب دلوڤانیا خۆ بارانێ ب بارینیت.
