ئەگەر تو شووفێری هوشیاری ڕەفتارێن خۆ بە
مستەفا مەلا سلیم ئاكرەیی
سپێدەكا زوی بوو، ئەز بەرەڤ نڤیسینگەها هاتووچوونێ دچووم، من دڤییا بەرەڤ باژێرێ هەولێرێ بچم، شوڤێرێ تەكسیێ ئەز ل پێشیاكێ دانام و ل پشتێ سێ نەفەر سیاربوون، پیرەژنەكا ب دان عەمر دگەل دوو كجێن گەنجێن سەروسیماێن وان یێن قوتابیێن زانكویێ بوون، شوفێر ژی زەلامەكێ سمبێل بوڕ بوو، ناڤچاڤێن وی هەمی هەمی گرێ بوون، گاڤ بۆ گاڤێ دا جامێ ئۆتۆمبێلێ ئینیتە خوارێ و جگارەكێ كێشیت و هندەك سترانێن وەكی خوە لێددان وجاروبارا ب دزیكیڤە دخودیكێرا بەرێ خوددا وان كچكان، من زانی ئەو یێن بێزابووین ل وان سترانێن بێ ڕامان و چاڤحیزییا شوفێری، هەلبەت یا دیاربوو كو ئەو پیرەژن یا نەساخبوو، ئینا ئەز نەچاربووم من گۆتە شوفێری: برایێ عەزیز بلا بۆ خاترا خودێ بیت ڤان سترانا ڕاكە وجگارا نەكێشە، تەئەم یێن نەڕەحەتكرین. ل وی دەمی ئەو هەردو كچك ژی ب زمان هاتن و گۆتە شوفێری:
مامێ مە ڕاست دبێژیت، باشترە تو جكارا نەكێشی ودەنگێ سترانا نزمكەی. ئینا شوفێری دەستێ خو هاڤێتە چەكمەچییا ئۆتۆمبێلێ و گۆتی:
دێ كاسیتەكا خۆش یا گەنجان بۆ هنگو لێدەم، ل وی دەمی ئەو یێ مژویلی كاسێتابوو، من هند دیت ئۆتۆمبێلا مە ژ جادەیێ دەركەفت، چ نەمابوو دا دكەندەكی دا چینە خوارێ و گیانێ خۆ ژدەست دەین، لێ من دەمودەست بەرێ ستێرنی وەرگێڕا و جارەكا دی هاتینە سەر جادێ ڤە، ئەو هەردو كچكێن گەنج گەلەك ترسیان و كرە قیژی و هەوار، من ژی گەلەك قسەیێن كرێت گۆتنە شوفێری و من داخواز ژێ كر ئۆتۆمبێلا خو ڕاگریت و دێ هێینە خوارێ و ب ئۆتۆمبێلەكا دی دێ چین، ب هەر حال هەرچەندە وی داخوارزا لێبورینێ كر.
لێ من گەلەگ ئامۆژگاری لێكرن، بودەمەكی ئەم بێدەنگ بووین وی ژی لەزاتییا ئۆتۆمبێلا خو كێمكر، پاشی شوفێری گۆتە وان كچكان: هژمارێن خو یێن تەلەفونێ بدەنە من، دونیایە ئەگەر هوین جارەكی پێدڤی ب تەكسیێ بوون هوین دشێن تەلەفونا من بكەن! لێ وان كچان بەرسڤا وی نەدا، هەلبەت یادیاربوو نیازا شوفێری یا خراب بوو، من ژی هەدار نەما و گۆتە شوفێری باشە بێژە من تو چ مرۆڤەكی، ما تو شەرمێ ژخوە ناكەی؟
هیڤیدكەم ڕێكا خۆ بگرە و ئاخفتنێن بێ واتا نەكە، نزانم وی بەرسڤا من نەدا، بتنێ گۆتە مە ئەگەر دەستویری هەبیت مزگەفتەكا ل ڤی ڕەخێ جادەیێ هەی من نڤێژ نەكریە دا نڤێژا خۆبكەم. ڤێجا هوین سەحكەنە ڤی تشتێ سەیر كا چەوا وی بێ ڕەوشتییا خۆ ب نڤێژێڤە گرێدا و ساخكرەڤە.
دەمێ ئەو چوویە مزگەفتێ من گۆتە وان دو كچكان: پیچەك بێهنا خۆ فرەهبكەن، چ نەمایە دێ گەهینە زالگەها هەولێرێ، ئەزدێ ئاسایشا زالگەهێ ئاگەهداركەم كو ئەڤ نە چ مرڤە دا بهێتە سزادان، وێ پیرەژنكا نەساخ گوە ل سوحبەتا مەبوو، ب دەنگەكێ نزم گۆتی: لێگەرێ حەوالەی خودێ بكە دا زوی بگەهین ئەز گەلەكا نەساخم. ڕاستە دبێژن شوفێری ئارەزویە و هونەرە و ڕەوشتە!
