ئەگەر نڤیسینگەها مادێ 140 بهێتە ڤەكرن دێ هەموو هێنە قەرەبووكرن
سالار محەمەد دۆسكی:
كاڤین شێخ سەعید بەربژارا ژمارە 62 د دیدارەكێدا دیار كر، ل پەرلەمانی ئیمزا كومكرینە و رازیبوونا هادی عامری وەك بەرپرسێ مادێ 140 وەرگرتینە كو ل میزانیا داهاتی بۆدجا دەڤەرێن مادێ 140 بهێتە زێدەكرن و خەلكێ دەڤەرێن مادێ 140 ل بەسرا و دیالا و گەلەك جها هاتینە قەرەبووكرن و ژ نەبوونا نڤسینگەها 140 ل دەڤەرێن مە خەلكێ مە نەهاتبوو قەرەبووكرن، پشتی ڤەكرنا نڤیسینگەهێ مە داخواز كریە خەلكێ مە بهێتە قەرەبووكرن و هەتا نوكە 18 هزار فایلێن وەلاتیان چاڤەرێ قەەبووكرنێ نە.
بەربژار كاڤین شێخ سەعید مزیری، بەربژارا ژمارە 62 ل سەر لیستا 275 یا پارتی دیموكراتی كوردستان ل پارێزگەها نەینەوا بۆ رۆژناما ئەڤرۆ گۆت: پرۆگرامێ پارتی یێ دیارە، پشكداری، هەفپشكی و سازانە و دێ هەمی بزاڤا كەین مافێن خەلكێ هەرێما كوردستانێ ب دەست ڤە بهێن و كەسانێن دلسوز بین و دلسوزی گەلەك یا گرنگە بۆ خەلكێ كوردستانێ و دێ كار ل سەر دەست ڤەئینانا مافێن خەلكێ كوردستانێ كەین دچارچووڤێ دەستوری دا كو هەتا نوكە پێ نەهاتینەدان.
كاڤینێ ئەو ژی دیاركر، پشكا هەرێما كوردستانێ د بۆدجێ دا 17% حوكمەتا ئیراقێ وێ رێژێ ژی بۆ هەرێمێ ناڤرێكەت و هەتا 11% ژی ناهێـتەدان، باشە ئەو 90% كیڤە دچیت و ل كیرێ دهێتە مەزاختن، بۆچی ئەو ڤێ چەندێ دیارناكەن و چاڤێ وان ب تنێ ل 10% یا هەرێما كوردستانێ یە و ئەڤە د دەمەكی دایە دزانن هەرێما كوردستانێ ژ هەر روویەكی ڤە و روویێ ئاڤەدانیێ ڤە چەند پێشكەفتن بخوەڤە دیتی یە.
كاڤینی گۆتژی: ل خولا بوری گەلەك كێشێن دەڤەرێن كوردستانی ل سنورێ مادێ 140 من چارەسەركرینە بۆ خەلكێ خوە و شیابووم گەلەك خزمەتا دەڤەرێ بكەم و پرۆژە هەبووینە ل سالا 2010 هاتبوونە داخازكرن، بەلێ نەهاتبوونە بجهئینان و كارێ پەرلەمانی دانانا قانوونا یە و چاڤدێریكرنە ل سەر كارێن حوكمەتێ و ژ كارێن مە جادا بەدریك باعەردێ بۆچی چەندین سالا نە هاتیە بجهئینان و پشتی دووڤچوونێن مە مووسل داخازكربوو 39 ملیارا و بەغدا 31 ملیاران داخاز كربوو، ئەو جادە بهێـتە دروستكرن و هەردیسا جادا نەوەران شێخان مویسل گەلەك پارە داخاز كربوون.
زێدەتر دبێژیت: ئەم شیاین 45 ملیار دیناران بۆ دەڤەرێن خوە بدەست ڤە بینین و ئەڤە پشتی مە چەندین دووڤچوون بۆ وەزارەتێن پەیوەندیدار كرین، چونكە گەلەك روودان ل ئەوان جادا دروست بوون، پرۆژە هەنە و هێشتا نەهاتینە بجهئینان و دڤێت كار ل سەر بكەم وەكی نەخوشخانا شێخان یا 100 تەختی كو بهایێ وێ 74 ملیار بۆ هاتینە دەست نیشانكرن، وێستگەها كارەبێ ل شێخان كار تەمام بووینە و 39 ملیار بۆ هاتینە دەست نیشانكرن، پرۆژێ جادا زالگەها ئالوكا هەتا بەدریك ئەو جادە ژی گەلەك یا گرنگە و مە رازیبوون ئینایە.
ئاشكەراكر ژی كو شیابوو بۆ 6000 هزار نەخوشان مووچێ چاڤدێریی رازیبوونێ بینیت و هندەك ماینە دێ كار ل سەر یێ بەردەوام بیت و گۆتژی: دێ هەمی بزاڤا كەین كێشێن مووچەی بهێنە چارەسەكرن و هیڤیا بەغدا نەیا باشە و ئەو داخواز دكەن هەرێم خوە رادەست بكەت و ئەڤە دژی مافێن دەستورێ ئیراقێ یە.
ل دووماهیێ گۆت: چەند سال بوو دامەزراندن هاتبوو راوستاندن، بەلێ ل 2026 دێ دەست پێ كەتە ڤە و دێ كاركەین نوونەرێن دەڤەرێ ل سازیێن حوكەتێ زێدەتر بهێنە دامەزراندن و پشتەڤانەكا سەرەكی مە بۆ تەخا گەنج و ئافرەتان.
