ئەگەر هاریکاریا مە یا دراڤی نەهێتەکرن زنجیرە درامایا خۆدیك ناهێتە بەرهەمئینان
زاخۆ، دلۆڤان هالۆ:
مەهدی مونیر، بەرپڕسێ بەشێ شانۆ و سینەمایێ ل ڕێڤەبەریا ڕەوشەنبیری و هونەری یا زاخۆ و دەرهێنەرێ زنجیرە دڕاما خۆدیك د دیدارەکێ دا بۆ ڕۆژناما ئەڤرۆ دیار کر کو ئەگەر ئەڤ سالە هاریکاریا مە یا دراڤی نەهێتە کرن بۆ پێدڤیێن تەکنیکی وەکو کامیرە و سیستەمێ دەنگی دێ زنجیرە دڕامایا مە یا بناڤێ خۆدیك ڕاوەستیت و ناهێتە بەرهەمئینان.
ناڤهاتی ئاماژە ب وێ چەندێ ژی کر کو ئاریشا مە یا سەرەکی یا هەر سال ئەوە کو ئەم بێ کامیرە و سیستەمێ دەنگی نە، سالێن دەربازبوویی مە کامیرەیێن هەڤال و برادەران ژێ وەردگرتن، لێ ئەڤ سالە ئەو ژی ب دەست مە ناکەڤن ژبەر کو ئەو ژی بۆ خوە پێ کار دکەن، لەوما ئەڤە چەند سالە ئەم گازیا خوە د گەهینینە ڕێڤەبەریا ڕەوشەنبیری و هونەری یا زاخۆ و ئیدارەیا سەربخوە یا زاخۆ لێ چ لایەك خوە ل گازندا مە ناکەتە خودان، ل ڤێ دوماهیێ گۆهدار شێخۆ سەرپەرشتێ ئیدارەیا سەربخوە یا زاخۆ گۆتیە مە دێ ئاریشەیا وە چارسەرکەین لێ هێشتا چ دیار نینە.
گۆت ژی:» دراڤێ پێدڤی بۆ چارەسەرکرنا ئاریشە مە یا تەکنیکی بتنێ گۆژمێ 7 ملیۆن دینارانە کو ئەم کامیرە و سیستەمێ دەنگی بۆ خوە پێ بکڕین، لەوما ئەگەر هاریکاریا مە یا دراڤی نەهێتە کرن زنجیرە دڕاما خۆدیك دێ ڕاوەستیت و ناهێتە بەرهەمئینان».
زێدەتر ژی گۆت:»ئەڤە چار سالە ل سەر ئێك بۆ هەیڤا ڕەمەزانێ ئەم زنجیرە دڕامایەکا خۆمالی یا کوردی یا پازدە خەلەکەیی ل دوور ڕەخنەیێن ئاڤەکەر و ئامۆژگاریان ب بەشدارییا پتری100 ئەکتەرێن کوردستانێ یێن بەرنیاس و خودان خزمەت بەرهەم دئینین، داکو ئەم ژ بەرهەمێ خۆمالی بێ بەهر نەبن و بەرێ خەلکێ ژ زنجیرە دڕامایێن بیانی یێن دووری دابوونەریتێن جڤاکێ مە وەرگێڕین کو کارتێکرنەکا نەرێنی یا خراب ل سەر کچ و کۆڕێن جڤاکێ مە هەیە، و ئەڤ ئاریشەیێن جڤاکی یێن نوکە د ناڤ جڤاکێ مە دا سەرهەل ددەن دەرئەنجامێن ڤان زنجیرە دڕامایێن بیانی نە، و پشتی چەند سالێن دی دێ ژ نوو باجا ڤێ چەندێ ب دروستی دەین».
