ئەیهەم جامی: چارەنڤیسێ پشكدارییا تیما مە دیار نینە
شاهۆ فەرید:
د داخویانیەكێ دا ئەیهەم جامی سەرۆكێ یانەیا باتیفا بۆ رۆژنامەیا ئەڤرۆ دیاركر: هەتا نوكە بەرهەڤیێن تیما مە یا فوتبۆلێ بۆ پلەیا دو یا كوردستانێ دیار نینن و هیچ داهاتە مە نینە ئەم پشتبەستنا خوە پێ بكەین.
هەروەسان ناڤهاتی گۆت: ژبەركو ژڤانێ خولا پلا دو دێ ل شۆباتا سالا بهێت بیت مە پلا هەیە زووتر خوە بەرهەڤ بكەین پێخەمەت تیمەكا بهێز بهێتە دروستكرن، لێ كاودانێن دارایی یێن یانەیێ دخرابن چ داهاتەك مە نینە، هەرچەندە لڤێ دووماهیێ جەنابی فەرماندە مەنسوور بارزانی كۆژمەكێ پارەیی بۆ مە مەزاخت ئەم شیاین دەینێن خوە پێ بدەین و یێ مایی بۆ پێدڤێن خولێ بهێلین لێ تێرا بەرهەڤیان ناكەت، هێشتا بڕیارا پشكداریێ نە هاتیە ئێكلاكرن، هەكە كاودانێن دارایی هاریكاربوون دێ پشكداربین، لێ هەكە وەكو خوە بمینت نەشێن پشكداری خول و چالاكێن وەرزشی بكەین.
هەروەسان ناڤهاتی گۆت: دێ پرانییا پشتبەستنا مە ب كوڕێن باتیفا و دەورۆبەرا بیت هەكە پێدڤی كر دێ یاریزانێن باژێرێ زاخۆ پەیداكەین، هەكە شیانێن مە دباشبن دێ یاریزانێن دەرڤە ئینین، داخوازیی ژ بەرێز گۆهدار شێخویی سەرپەرشتێ ئیدارا سەربەخۆیا زاخۆ دكەین هاریكاریا مە ژی بكەت وەكۆ یانەیا زاخۆ ئەم هەست پێنەكەین گرنگی مە ناهێتەدان چونكۆ ئەم دو یانە بناڤێ ئیدارا سەربەخوەیا زاخۆ پشكداریێ دكەین، ئەڤە بۆ ماوەیی پتری شەش هەیڤانە ئەو سیێ ملیونێن داینە مە ئەو ژی هاتینە ڕاوەستاندن، سەرەرایی وان قەیرانا مە پشكداری خولێن ناڤخوەیی و ئیراقێ كرینە و رێزبەندێن باش مە دەستڤە ئیناینە.
ئەیهەمی گۆت ژی: هەتا نوكە ئەم بێ یاریگەهین و سۆز مە دابوون ئەردەك بۆ مە بكرن و یاریگەهەكێ ئاڤا بكەن لێ نەهاتیە بجهئینان، مە نڤیسارەكا فەرمی داخواز ژ نڤێسینگەها جەنابێ سەرۆك وەزیران مەسرۆر بارزانی كریە و بەرسڤ لسەر داینە بۆ رێڤەبەریا وەرزش و لاوان و هووربینی لسەر هاتیەكرن و دووبارە بۆ نڤێسینگەها سەرۆك وەزیران فرێكریە لێ بەرسڤ نەداینە، نەبوونا یاریگەهێ كارتێكرن مە كریە و نەشێن بخوە یاریزانێن ئاستێ ژیێن جودا بەرهەمبینین، تنێ ئێك یاریگەه مە قەزا باتیفا هەیە ئەوژیی ئەردێ وێ تێكچوویە و مە ئاڤاهی ژی نینە و دخوازین زیترین دەم دووڤ گازیا مە بهێن.
