(اللهم أنصر إخواننا المجاهدين في الشيشان)
ل ده‌مێ سنێله‌یێ و ب تایبه‌ت ل سالێن نوتان، ده‌ما ل رۆژێن ئه‌ینی به‌رێ زۆربه‌یا خه‌لكێ دهۆكێ ژ زارۆ و گه‌نج و پیران دكه‌ته مزگه‌فتان بۆ ئه‌داكرنا نڤێژا خوتبێ، پڕانیا مه‌لایێن مه ل سه‌ر بلندگۆیا (منبر) ده‌ستێن مه به‌رێڤه‌ی ئه‌سمانان دكرن و ب ده‌نگه‌كێ بلند هاوار و پارانه‌وه و دوعا ژ خودێ ته‌عالا دكرن و دگۆتن: (اللهم أنصر أخواننا المجاهدین فی الشیشان)، نڤێژكاران ژی وه‌ك (دار دۆرا) خواندنا سه‌ره‌تایێ دگۆتن: ( ئامیییین). پشتی دوعا و پارانا مه خودێ ته‌عالا قه‌بوولكرین و برایێن مه یێن شیشانی بسه‌ركه‌فتین، ئه‌وان برایان، به‌رێ خوه دا عێراقێ و مووسلێ، پاشی بۆ شنگال و دهۆك و مه‌خمورێ! لێ ئه‌ڤجاره ل ژێر سیبه‌را ناڤێ داعش. ئه‌ڤێ جارێ ژی خودێ ته‌عالا دوعایێن مه قه‌بوولكرن و ته‌یرێن ئه‌بابیلێن ئه‌مریكی و فه‌ره‌نسی د هه‌وارا مه كوردان هاتن و نامووس و شه‌ره‌ف و ئاخا مه ب هاریكاریا پێشمه‌رگێ قاره‌مان هه‌تا راده‌كێ باش پاراست. یا سه‌یر ئه‌وه هه‌ر ل ڤان مزگه‌فتان هنده‌ك جاران دوعا ژ خودێ دهاته كرن كو هه‌ر ئه‌ڤ ئه‌مریكی و فه‌ره‌نسیه ژ ناڤبچن، نڤێژكاران ژی وه‌ك هه‌ر جار و بێی دو دلی وبێی كو بزانن كو ناڤه‌ڕۆكا دوعایێن وان چه‌ندا گرنگه بۆ خودێ ته‌عالا، دگۆتن: (ئامییییین).
هه‌كه ل وی ده‌می نڤێژكاره‌ك راببا سه‌ر پێن خو و گۆتبا مه‌ڵای: (بێ ده‌نگ به و به‌س دوعا بۆ شیشانیان بكه)، ئه‌ز پڕ باوه‌رم دا ئه‌و نڤێژكاره باش ل ناڤ مالا خودێ هێنه قوتان و هه‌رچیا خرابه دا ل سه‌ر بێژن!. لێ خۆزی ئه‌ز ئه‌و نڤێژكاربام، چونكو دا ئه‌ڤرۆ ببمه كه‌سه‌كێ ژیر و تێگه‌هه‌شتی و دا ده‌ست بۆ وی كارێ منێ هینگێ هێنه قوتان.
نوكه ژی دێ خۆزیه‌كا دی كه‌م (هندی بیرا من دهێت ئه‌م یێن خۆزیان ڕادهێلین) و دێ بێژم خۆزی ئه‌ز شیابم نه هێلێم ئه‌ڤ ساله كه‌س بچیته حه‌جێ!! ره‌نگه ئه‌ڤ گۆتنه گه‌له‌ك كه‌سان تۆڕه بكه‌ت و ڤێجا ناڤ چاڤێن وان تێكبچن و تبلێن وان ل سه‌ر كیبۆردێ لاپتوپێ بكه‌ڤنه كاری و په‌یڤێن كرێت ل دژی ڤێ گۆتنا من بڤه‌هینن كا چاوا ژه‌نیارێ جیهانی (یانی) ب تبلێن خوه ل سه‌ر پیانۆیێ ئاوازان دژه‌نیت. هه‌لبه‌ت ژه‌نینا (یانی) بۆ ژیانێ یه و ڤه‌هاندنا وان كه‌سان ژی بۆ ره‌خنه‌كا بێ هزر و بنه‌مایه.
ل ڤێرێ گرنگه ره‌خنه‌گر به‌ری ده‌ست ب هێرشان بكه‌ن و ره‌خنه‌یێن دژوار ئاره‌سته‌ی ڤێ نڤسینێ بكه‌ن، ل گه‌ل من ب ئارامی بهێن هنده‌ك ژمێریاریان بكه‌ین و به‌راوردیا باردۆخێ ئه‌ڤرۆ یێ كوردستانێ بكه‌ین و تێڕوانینا شه‌رعێ خۆدێ ژی د گه‌لدا بیت، ئه‌ز پڕ باوه‌رم دێ ره‌خنا وی بیته دووڤچوون و پاشی ده‌ست خۆشی. هه‌ر كه‌سه‌ك ژ هه‌رێمێ به‌ر ب مالا خودێ ته‌عالا ڕێ بكه‌ڤیت دڤێن ل ده‌ستپێكێ (4200000) دینار ئانكو (3400) دۆلارا بده‌ت، بۆ خوارنا رۆژانه بۆ ماوێ هه‌یڤه‌كێ ب كێمی دڤێن (200) دۆلاران خه‌رج بكه‌ت، هه‌ر وه‌سا خه‌رجكرنا (100) دۆلار بۆ هه‌ر قوربانه‌كی كۆ دڤێن بده‌ت و نێزیكی (600) دۆلاران بۆ كرینا دیاریا دهێنه خه‌رج كرن، سه‌رجه‌مێ گشتی یێ خه‌رجكرنا هه‌ر حه‌جیه‌كی دگه‌هیته نێزیكی (4300)دۆلار. ژمارا حه‌جیێن ئه‌ڤ ساله ژ كوردستانێ چووینه مالا خۆدێ ته‌عالا دگه‌هیته (3500- 4000) كه‌سان، هه‌كه ئه‌م ژمارا كێمتر (3500) وه‌رگرین و لێكبده‌ین ل گه‌ل سه‌رجه‌مێ خه‌رجكرنێ كۆ (4300) دۆلارن دێ ده‌رئه‌نجام بیته (15050000) دۆلار، ئانكۆ پانزده ملیۆن و پێنجی هزار دۆلار، هه‌لبه‌ت ئه‌ڤه ب كێمی.
پسیار: دێ ب ڤی گۆژمه‌ی چه‌ند كه‌مپ بۆ ئاوارا دروست بن؟ یان دێ چه‌ند قوتابخانه هێنه ئاڤاكرن؟ دێ چه‌ند قوتابی شێن خواندا بلند ل ده‌رڤه‌ی وه‌لاتی پێ ده‌رباز كه‌ن؟ چه‌ند كێشێن كۆمه‌ڵایه‌تی دێ پێ هێنه چاره‌سه‌ركرن؟ چه‌ند پر و جاده و كارێن خزمه‌تگوزاری هێنه ئاڤاكرن؟ مووچێ چه‌ند پێشمه‌رگان دێ پێ هێنه دابینكرن؟.. .. . هتد.
ژ لایێ شه‌رعیڤه، هه‌كه ئه‌زێ شاش نه‌بم، باشتربوو هه‌كه ئه‌ڤ پاره بۆ ناڤخوه‌یا كوردستانێ هاتبا خه‌رجكرن دا هه‌مان خێر گه‌هیته حه‌جیان هه‌كه نه زێده‌تر. ره‌نگه هه‌ر نه یا دروسته كه‌سه‌ك سه‌ردانا مالا خۆدێ ته‌عالا بكه‌ت و ده‌وروبه‌رێن وی ژ كه‌سوكاران، گوند و هه‌ڤده‌را پێدڤی هاریكاریا مادی بن.
هیڤیدارم كه‌س خه‌له‌ت ل من نه‌گه‌هیت، چونكو مه‌به‌ست ژ ڤێ نڤیسینێ ئه‌و نینه به‌رێ خه‌لكی ژ چوونا حه‌جێ سار بیت، به‌لكۆ هیڤیدارم ل پاشه‌رۆژێ خودێ ب رزقێ مه‌ژی بكه‌ت، لێ ژ به‌ر كاودانێن رۆژه‌ڤا كوردستانێ، ب دیتنا من دا باشتر بیت هه‌كه ئه‌ڤ ساله حه‌ج هاتبا پاشخستن بۆ سالێن بهێن. گومان تێدا نینه حه‌جیێن مه ئه‌ڤ ساله ل به‌ر به‌رێ ره‌ش گه‌له‌ك دوعا بۆ گه‌لێ كوردستانێ و پێشمه‌رگه‌ی یێن كرین و دلسۆزیا خوه بۆ خودێ و كوردستانێ یا دوپاتكری، هیڤیه خودێ ته‌عالا دوعایێن هه‌میان ئه‌رێ بكه‌ت.