بابێ من ل گەل سێ پسمامێن خوە ل باژێرێ مویسل هاتنە سێدارەدان
باعەدرێ، سالار محەمەد دۆسكی:
پشتی نسكویا 1975ێ پتر ژ 100 خێزانێن دناڤا شنگال دا كو زێدەتر كارێ رێكخستنێ و بنەمالێن پێشمەرگەیان بووینە ژلایێ رژێما بەعس یا هەرفتی ڤە هاتنە دەركرن، و زێدەتر هاتنە باژێرێ زاخۆ و دووڤدا ب فەرمانا بنەمالا (میرا) بۆ ناحیا باعەدرێ هاتنە ڤەگوهاستن و هەتا نوكە دئاكنجی نە.
ژیێ من دو سال بوون دەمێ بابێ من ل گەل هەرسێ پسمامێن خوە ل باژێرێ مویسل هاتینە سێدارەدان و ماوێ كێمتر ژ سالەكێ پتر ژ 70 كەسان دناڤا مالا مە دا ب رێكێن جودا گیانێ خوە ژ دەست دان، ئەڤە دەسپێكەكا ئاوارا خەلكێ شنگال بوو كو پتر ژ 100 خێزانان ل شنگال هاتینە دەركرن و بۆ باژێرێ زاخۆ و دووڤ دا بۆ باعەدرێ هاتینە ڤەگوهاستنن ئەڤە گۆتنێن، پیر دەخیل دەروێش داودی نە كو خەلكێ گوندێ (بەرانایە) سەر ب قەزا شنگال ڤە، د دیدارەكێ دا ل گەل رۆژناما ئەڤرۆ دیاركر كو دەسپێكا سالێت شێستا بابێ وی ئێك ژ رێكخستیێن پارتی دیموكراتی كوردستان بوویە ل شنگال و ئەف رێكخستنە بەردەوام د گەشێ دا بوو ل دەڤەرێ هەتا بەیانا 11ی ئادارێ ل سالا 1970ێ شنی خەلكێ شنگال خوە دیاركرن كو رێكخستی بووینە پێشتر و دەست ب خەباتا مەدەنی كرن وی دەمی بابێ من بوو پێشمەرگە و بەردەوام بوون هەتا سالا 1974ێ كاودان د ناڤبەرا سەركردایەتییا كوردستانێ و حوكمەتا وی دەمی یا ئیراقێ دا تێكچوون، و شنگال ژی وەك هەمی دەڤەرێن كوردستانی كاودان گەلەك تێكچوون، رێكخستی و پێشمەرگێن شنگال بوونە چەندین چەق و هندەك چوونە سوریێ و هندەك چوونە زاخۆ و هندەكا خوە رادەستی حوكمەتێ كر و گەلەك خوە رادەست كر ب مەفرەزە، وی دەمی بابێ من ل گەل یازدە پێشمەرگە ل قەزا تەلەعفەر ژلایێ رژێمێ ڤە هاتنە دەستەسەركرن، ل نیسانێ هاتنەگرتن و هاتنە ڕەوانەكرن بۆ پارێزگەها مویسل و 18/8/1974 هاتنە سێدارەدان، بابێ من ل گەل سێ پسمامێن خوە كو دبنە خالێن من هەر چار هاتنە سێدارەدان، وی دەمی مالێن مە ل باژێرێ زاخۆ بوون و دەمێ هاتینە دەستەسەركرن وی دەی بتنێ بووم، و پشتی سێدارەدانا بابێ من خویشكا من ژ دایك بوو، دەمێ بابێ من هاتیە سێدارەدان وی دەمی ژیێ من دو سال بوون.
پیر دەخیل ئەو ژی گۆت پشتی نسكویا 1975ێ پتر ژ 100 مالێن ئێزدی خەلكێ شنگال كو هاتبوونە باژێرێ زاخۆ و نێشتە جێبوون، وی دەمی كاودان گەلەك بەرتەنگ بوون و ژیان گەلەك یا بزحمەت بوو و دیسا حوكمەتا بەعس ژی ب چاڤەكێ گەلەك كێم تەماشەی وی خەلكی دكر، و دووڤدا ب بریارەكا (خەیری بەگ)ێ ئەو مالێن ئێزدی هەمی ژ زاخۆ هاتنە ڤەگوهاستن بۆ ناحیا (باعەدرێ)ێ، و بنەمالا (میرا) عەرد بۆ ڤی خەلكی دابینكرن و ئەڤە ژ وێ سالێ وەرە هەتا نوكە ئەم ل باعەدرێ دژین، وەك خویشك و برا ل گەل ڤی خەلكی دژین و ئەم گەلەك سوپاسی یا بنەمالا (میرا) دكەین بۆ هاریكاریا ڤی خەلكی.
پێشمەرگەكێ شۆرەشا گولانێ بناڤێ (قاسو عەلو ساڤارا) كو خەلكێ شنگال بوویە و ل گەل ئەوان مالان بوویە ئەوێن هاتینە دەركرن، بۆ باژێرێ زاخۆ و دووڤدا ب فەرمانا (خەیری بەگ)ێ ل باعەدرێ ئانكنجیووین، بۆ رۆژناما ئەڤرۆ گۆت: ئەڤ بنەمالە سێ برا بوون (پیردەبلوش، پیر براهیم، پیر داود) (25) برنو دناڤا ڤێ بنەمالێ دا هەبوون، ئەڤان هەرسێ برا هەر ئێكی حەفت هەشت كور هەبوون و گەلەك دەولەمەند بوون و هەمی خەلكێ گوندێ بەرانا بووینە، ژ بەر چەند كێشا كو بۆ گشت بنەمالێ دروست بوون ئەڤان مالان باركر و دەمێ باركرین، مرنەكا مەزن كەفتە ناف ئەڤان مالان و ماوێ سالەكێ دا پتر ژ (70) كەسان ژ ئەڤێ بنەمالا مەزن و دەولەمەند وەغەركرن و هەر ئێك ب رێكەكا جودا و خەلك پێ ئاخڤی و ب چاڤن چوون چونكە كەسەكێ نەدزانی ئەڤ بنەمالە گەلەك یا بهێزە و خەلكی نەنیاسین كو هند مرۆڤن وی دەمی هێشتا ل گورستانێ كەسەكێ دی وەغەر دكر و بڤی رەنگی كاودانێن دەروونیێن ئەڤێ بنەمالێ تێكچوون و گەلەكا وەغەركرن و زێدەباری هەشت مرۆڤ ژ ئەڤێ بنەمالێ شەهیدێن كوردستانێ بووینە.
هەمان پێشمەرگەیێ شۆرەشا گولانێ،(قاسو عەلو ساڤارا) زێدەتر گۆت: گەلەك هەڤالێ بابێ پیر دەخیل بووم ئەڤێ ژلایێ رژێما بەعس ڤە ل گەل سێ پصمامێن وی ل باژێرێ مویسل هاتینە سێدارەدان وی دەمی مە هێرشی چ كەسێ نەدكر بەلكو زێدەتر كارێ رێكخستنێ بوو دناڤا شنگال و دەر دوران و پشتی بەیانا یازدەی ئادارێ سالا 1970ێ كاودانێن مە خەلكێ شنگال تێكچوون چونكە دوژمنی هوسا هزر نەدكر كو رەوش بڤی رەنگی یە و زێدەتر خەلكێ مە بووینە پارتی دیموكراتی كوردستان و تایبەت دەمێ هاتنا خودێ ژێ رازی (ئدریس بارزانی) بۆ شنگال زێدەتر رژێم تێكچوو و پتر دڤیا بهێنا خەلكی تەنگ بكەت و بترسینت، سالا 1974ێ تەنگاڤیا كەفتینە تێدا دەمێ بابێ دەخیل ل گەل هەرسێ پصمامێن خوە كەفتیە دەستێ حوكمەتا بەعس و باژێرێ مویسل هاتینە سێدارەدان.
پیر دەخیل ئەو ژی گۆت: بنەمالێن پیرا بگشتی پێشمەرگە بووینە ل شورەشا ئیلونێ و ئەڤە ئەگەرەك بوو ژ سەر مال و ملكێن خوە بهێنە دەركرن و بۆ باژێرێ زاخۆ بهێنە ڤەگوهاستن و ئەڤە هێڤن و دەسپێكەك بوو بۆ بنەمالێن پیرێن ئێزدیان كو هەتا ئەڤرۆ ئەم پێشمەرگەینە و ل سەر وێ رێباز و پەیاما كوردستانی د بەردەوامین و دێ دبەردەوام بین و ل دەسپێكا سەرهلدانێ مە دەست ب كارێ پارتایەتی كر و چوومە ناف رێزێن پارتی دیموكراتی كوردستان دا وی دەمی بوومە بەرپرسێ شانەكا حزبی هەتا سالا 2006ێ، وی دەمی ئەف رێكخراوا باعەدرێ نڤێسینگەه بوو ل سالا 2006 بوومە كادر سەر ب لژنا ناوچا شێخان ڤە، ل سالا 2017 ێ بووم ەبەرپرسێ رێكخراوێ و دووڤ دا بوومە كادرێ لژنێ و سالا بوری جارەكادی بوومە بەرپرسێ رێكخراوا باعەدێ یا پارتی دیموكراتی كوردستان.
پیر دەخیل دەروێش داود، ل دووماهیێ گۆت: داخازا مە یا دووماهیێ زێدەتر مافێن كەسانێن خەبات كرین و قوربانی داین نەهێتە بەرزەكرن و پتر چاڤ خشاندن ل خێزان و كەس و كارێن شەهیدان هەبیت و كەسێن ماندیبووین دیتی و دەربەدەری پتر چاڤدان ل سەر هەبیت.
