بابێ وێ ژی سترانبێژە
هەرهین محەمەد:
ئایلین نزار، زارۆیەكا هەشت سالی یە، نوكە قوتابیە ل ل قوتابخانا ئەڤرۆ ستی/ پۆلا چارێ، د دیدارەكێ دا بۆ رۆژناما ئەڤرۆ گۆت: ئەز گەلەكا بچووك بووم دەمێ من ستران دگۆتن و ئەڤ حەزە ل گەل من مەزن بوو بابێ من ژی سترانبێژە و خودان چەندین كلیپە ئەو پشتەڤانێ سەرەكی یێ مە و گەلەك جاران دەمێ ئەو سازێ دژەنیت و سترانان دبێژیت ئەز ژی ل گەل دبێژم و ئەو چەندە بۆ من راهێنانەكا باشە و دەمێ ل قوتابخانێ ژی سترانان بۆ هەڤال و ماموستایێن خوە دبێژم سترانێن مەزنان و یێن زارۆیان ژی دبێژم و ل دەستپێكێ من گەلەك گوهداریا سترانێن رۆكەنێ دكر و من ژی ڤیا وەكو وێ بمە سترانبێژ.
هەروەسا گۆت: ب هاریكاریا بابێ من شیایمە ئێكەم سترانا خوە ب ناڤێ (گەلی زارۆیان) تۆماربكەم ژ ئاوازێن سامی كۆچەرن و ل دەمەكێ نێزیك دێ كلیپ كەم و من ل بەرە ل گەل سترانان خۆ فێری ئامیرەكێ مۆزیكێ ژی بكەم.
