باتیفا دێ سکالایه‌كێ تومار که‌ت
زاخۆ، عەلی حاجی:
د داخویانیەکێ دا سەروکێ یانه‌یا باتیفا یا وەرزشی بۆ رۆژناما ئەڤرۆ دیار کر وان ب شێوەیەکێ فەرمی سکالا ل سەر یانه‌یا شێلادزێ تومار کریە و ب هەمی ڕەنگان زیان ب وان کەفتیە.
زێدەتر ئەیهەم جامی گۆت: د یاریا وان بەرامبەر یانا شێلادزێ دا ژلایێ جەماوەرێ وێ یانێ ڤە هێرشی وان هاتیە کرن و شەش ژ جەماوەر و شوفێرێ مە هاتینە بریندارکرن و زیانێن مه‌زن ب ترۆمبیچلا ڤه‌گۆهاستنا یاریزان كه‌فتیه، زێدەباری وێ دەمێ یاری ب دووماهی هاتی بتنێ پولیسێن بلێ دگەل مەدا مابوون و ئێک ئه‌ندامێ دەستەیا کارگێریا یانه‌یا شێلادزێ دگەل مەدا نەمابوون و هەتا په‌یوه‌ندی ژی بۆ مە نەکرینه، پشتی یاری ب دووماهی هاتی زێده‌تری دەمژمێرەکێ ئەم ماینە دناڤ ژۆرا جلك گهورینێ دا ژ نوو ئەم هاتینە ژ دەرڤە، ژبەر جەماوەرێ شێلادزێ کو پێزانین گەهشت بونە مە کو وی جەماوەری ل سەر رێیا دێرەلوک بۆ شێلادزێ خوە ئامادەکرینە هێرشی مە بکەت، ئەم نەچاربووین د رێیا پیرس بۆ ئاکرێ رێیا خوە بگوهرین،ب هەمی ڕەنگان دژایەتیا مە هاتیە کرن.
ناڤبری گۆت ژی: د وێ سکالا خوە دا مە داخازا سزادانا یانه‌یا شێلادزێ کریە ژبەرکو ل دووڤ رێنمایێن ئێکەتیا تەپا پێی یا کوردستانێ کو ل دووماهیێ ژی تەئکیدی ل سەر هاتیە کرن کو هەر یانەیەکا توندوتیژیێ ب کاربینت دێ هێتە دوورئێخستن یان ژی سزادان، هەر دیسان پێدڤیە ژی ئەم بهێنە قەرەبووکرن ژبەر وان زیانێن ب مە کەڤتین .
