باجێن دارایی و ڕسوماتێن ژینگەهێ ژ ئینانا ترۆمبێلێن كارەبایی ناهێنە وەرگرتن
دلۆڤان ئاكرەیی
شیرەتكارێ بیاڤێ ژینگەهێ ل جڤاتا وەزیران دیاركر، حوكمەتا هەرێما كوردستانێ ژ پێخەمەت ژینگەهەكا پاك ل هەرێما كوردستانێ چەندین گاڤێن گرنگ هاڤێتینە و زۆر موەلیدە و پاڵاۆگەیێن نایاسایی هاتینە ڤەمراندن و هاندانا خەلكی ب رێكا لێبۆرینا گومركی ژی هاتیە كرن بۆ هاوردەكرنا ترۆمبێلێن كارەبایی، ڤێ چەندێ ژی باندۆرەكا ئەرێنی ل سەر ژینگەهێ هەبوویە.
ئەندازیار عەبدولڕەحمان سەدیق، شیرەتكارێ بیاڤێ ژینگەهێ ل جڤاتا وەزیرێن هەرێما كوردستانێ، بۆ رۆژنامەیا (ئەڤرۆ) گۆت: پرۆژێ رۆناهی گاڤەكا مەزنە و بوویە ئالاڤەك بۆ كێمكرنا زیانان و پارستنا ژینگەها هەرێما كوردستانێ و ژبەر پرۆژێ رۆناهی ژمارەیەكا زۆر یا موەلیدەیان هاتینە ڤەمڕاندن، ئەڤێ چەندێ ژی ل زۆر ئالیان ڤە مفا هەنە وەكۆ كێمكرنا زیانێن ژینگەهی ب رێكا دەركەڤتنا گاز و تەنۆلك و كێم بوونا دەنگێن جودا یێن ڤان ئامیرەیێن مەزن و نەمانا دیمەنێن چڕ یێن دووكێلێ و كێمبوونا زیانێن تەندرۆستی وەكۆ سەرئێشان و بێهێن تەنگی و گڕژبوونا ماسۆلكە و كێمبوونا زیانێن ئابووری، ژبەر تەرخانكرنا رێژەیەكا زۆر یا سووتەمەنییێ بۆ موەلیدەیان بۆ بیاڤێن دی یێن پێدڤی.
عەبدولڕەحمان سەدیق زێدەتر گۆت: ب بریارا سەرۆكێ حوكمەتا هەرێما كوردستانێ هەر پاڵاوگەهەك پابەندی رێنمایێن ژینگەهان نەبیت، دێ هێتە دائێخستێن و خودانێ وێ ژی دێ هێتە دەستەسەركرن و بۆ ڤێ مەبەستێ ژی سەرۆكێ حوكمەتێ زۆر لایەن یێن راسپاردێن بۆ ڤێ مەرەمێ، وەكۆ وەزارەتا ناڤخۆ و جڤاتا ئاسایش و رێڤەبەرییا پۆلیس و لێژنەیێن دەڤەرداری و پارێزگەهان و فەرمانگەهێن ژینگەهی كۆ ب هەوەكێ راببن دا كۆ دووڤچوونێ بۆ كارێن پاڵاوگەهێن سنۆرێ هەولێر و دهۆكێ ب كەن و تەڤایا پاڵاوگەهێن نەیاسایی هەتا كۆ پابەندی رێكارێن ژینگەهی دبن و دەرگەهێن وان بهێنە دائێخستن.
زێدەتر گۆت: پاڵاوگەهێن نەیاسایی دبنە سەدەمێ پیسبوونا كەش و هەوا و ئاخ و ئاڤا بن ئەردی، لەوما چەندین جاران خودانێن ڤان پاڵاوگەهان هاتینە ئاگەهدار كرن پابەندی رێنمایان ببن، بەلێ هندەك ژ ڤان جهێن هەنێ پابەند نەبووینە، لەوما هاتینە دائێخستێن و خۆدانێن وان هاتینە گرتن، بەلێ ب دلخۆشیڤە د نوكەدا كۆنترۆل ل سەر وان جهان هاتیە كرن و خودانێن هندەك ژ وان پابەندی رێنماییان بووینە.
ل دۆر هاوەردە و زێدەبوونا تڕۆمبێلێن كارەبایی گۆت: سەرۆكاتییا دیوانا جڤاتا وەزیرێن هەرێمێ هەر ل سالا بوری ب نڤیسارەكا فەرمی داخواز ژ وەزارەتا دارایی و ئابوورییا هەرێمێ كربوو، كارێ پێتڤی ئەنجام بدەن بۆ هەڵگرتنا باجا گۆمركی ب رێژەیا (١٠٠%) ل سەر هاوەردەیا تڕۆمبێلێن كارەبایی، ل چارچووڤێ گاڤێن پێشخستن بۆ پاراستنا ژینگەهێ هەرێما كوردستانێ، ئەڤە ژی چونكو ترومبێلێن كارەبایی هەڤالێن ژینگەهێ نە و دووكێل و دەرهاڤێژێن گازان نینە و كارەبا وێ ل ژێدەرێن وزەیا ناڤخۆو دهێتە دابینكرن.
شیرەتكارێ بیاڤێ ژینگەهی ل جڤاتا وەزیران خۆیا كر: د ئەڤسالەدا حوكمەتا هەرێمێ بریار دایە پارێ ئێكەم تۆماركرنا تڕۆمبێلێن تەمام كارەبایی نەهێتە وەرگرتن و ل پارەیێ ژینگەهی ژی بهێنە بەخشین و ئەڤ گاڤە ژی بۆ پاك راگرتنا ژینگەهی یە كۆ د رۆژا دەركەڤتنا ڤێ بریارێ هاتیە جێبجێكرن، لەوما دنۆكە دا خواست ل سەر ترۆمبێلێن كارەبایی ل هەرێما كوردستانێ زۆر زێدە بوویە، ب تایبەت پشتی دەركەڤتنا بریارا حوكمەتا هەرێما كوردستانێ بۆ لێخۆشبوون ل باجێن هاوەردەكرنا ترۆمبێلێن كارەبایی و دهێتە پێشبینیكرن كۆ ل سالێن بهێت ژمارەیەكا زۆر ل جورێن ترومبێلێن كارەبایی هاوەردەیا هەرێما كوردستانێ بهێنە كرن.
