باخچەلی: ل سووریێ پیلانێن مەزن ل دژی تورکیا دهێنە گێڕان
سەرۆکێ پارتا بزاڤا نەتەوەپەرست یا تورکیا دیار کر، ئەمریکا کار بۆ ئاڤاکرنا دەولەتەکا کوردی ل سووریێ دکەت، بابەتێ هەلبژارتنان ژی هەموو بەرنامێ ئەمریکا یە، ئەمریکا ب هەموو شیانێن خوە دوژمناتیا تورکیا دکەت و ژ بەر ڤێ یەکێ ژی دڤێت تورکیا باکورێ سووریێ داگیر بکەت.
دەولەت باخچەلی سەرۆکێ پارتا بزاڤا نەتەوەپەرست یا تورکیا دوهی د کۆمبوونا پارتا خوە دا ل پەرلەمانێ تورکیا ئاخڤی و دیار کر، ل سووریێ پیلانێن گەلەک مەزن ل دژی تورکیا دهێنە گێران، دەمەکە بەحسێ هەلبژارتنان دهێتە کرن، هەلبژارتن هەموو پیلانێن ئەمریکا نە، ئەمریکا دڤێت دەولەتەکا کوردی ل باکورێ سووریێ دروست بکەت، ئەمریکا دڤێت وەسا تورکیا لاواز بکەت، ژ بەر ڤێ یەکێ ژی دڤێت تورکیا پەیوەندیێن خوە ل گەل شامێ باش بکەت و گۆت: (دڤێت وەکو تورکیا ئەم پەیوەندیێن خوە ل گەل شامێ باش بکەین و پێکڤە ئێرشی باکورێ سووریێ بکەین، باکورێ سووریێ دێ بیتە جهەکێ گەلەک مەترسیدار بۆ پاشەرۆژا تورکیا، رێکخستنا تیرۆرستی ل باکورێ سووریێ هەر رۆژ پتر خوە بهێز دکەت و د پاشەرۆژێ دا دێ بیتە مەترسیەکا مەزن بۆ تورکیا، ژ بەر ڤێ یەکێ ژی دڤێت تورکیا هەر زوو یا پێدڤی بکەت، دڤێت باکورێ سووریێ داگیر بکەین).
دەولەت باخچەلی ئەو یەک ژی دیار کر، نها شام یا لاوازە، ل باکورێ سووریێ رەوش گەلەک ئالۆزە، ئەمریکا هەتا نها ل ژێر ناڤێ شەڕێ ل دژی تیرۆرێ شیایە پێگەهێ خوە بهێز بکەت، ئەمریکا دڤێت ل باکورێ سووریێ ب رێیا هەلبژارتنێن ئەڤسالە هەرێمەکا کوردی بهێتە ئاڤاکرن، ئەو یەک دێ رێ بۆ گوهۆڕینێن نوو ل دەڤەرێ ڤەکەت، بێگومان دێ کاریگەریا خوە یا هەری خراب ژی ل تورکیا کەت، دڤێت تورکیا ب هەموو شیانێن خوە رێگریێ ل کارەکێ وەسا بکەت، دڤێت باش بزانین هەر هەرێمەک ل باکورێ سووریێ بهێتە دروست کرن دێ بیتە مەترسی ل سەر ئاسایشا تورکیا، ڤێجا داگیرکرنا باکورێ سووریێ بژاردەیەکە کو دڤێت تورکیا کار ل سەر بکەت.
ئەو یەک د دەمەکێ دایە کو بەری دەمەکێ ژی سەرۆکێ پارتا بزاڤا نەتەوەپەرست هەمان داخوازی ژ ئەردۆغانی کربوو، لێ کەسێن نێزیکی ئەردۆغانی وەسا دبینن ئەو نەشێن بێی رازیبوونا ئەمریکا ل باکورێ سووریێ چو بزاڤەکێ بکەن، د رەوشا نها دا ژی ئەمریکا رازی نینە و رێ ژی نادەت تورکیا دەست ب چو بزاڤێن سەربازی بکەت، ژ بەر ڤێ یەکێ ژی تورکیا ب رێیا پەیوەندیێن دبلۆماسی ل گەل ئەمریکا بزاڤا ڤێ یەکێ دکەت رێ نەدەت هەلبژارتن ل باکورێ سووریێ بهێنە کرن.
چاڤدێرێن سیاسی ژی دیار دکەن، شامێ دڤێت ب رێیا دانوستاندنان ل گەل رێڤەبەریا خوەسەر یا باکورێ سووریێ پرسێن هەی چارەسەر کەت، بەری دەمەکێ ژی بەشار ئەسەدی د کۆمبوونا پارتا خوە ل شامێ دا دیار کربوو ئەو نەشێن ب شەڕی پرسێن هەی ل گەل رێڤەبەریا خوەسەر چارەسەر بکەن.
