بادەکێن گەندەلیێ دھێنە کۆمکرن
ئەڤرۆ نیوز:
ئەندامەکێ لژنا نەزاھێ بۆ رۆژناما ئەڤرۆ ئاشکرا کر کو کەسێن ب تۆمەتا بازرگانیێ دگەل داعش ھاتینە دەستەسەرکرن ھێشتا رۆھن نەبوویە ھاتینە سزادان یان ئازادکرن، ژێدەرەکی ژی بۆ رۆژناما ئەڤرۆ پشتڕاستکر ڤێ حەفتیێ لژنا نەزاھێ دێ کۆمبیت.
نەجیبە لەتیف، بڕیاردەرا لیژنا نەزاھێ لپەرلەمانێ کوردستانێ دیار کر کو وی دەمێ پەرلەمانی کار دکر بەری سالەکێ ھژمارەکا لژنێن چاکسازیێ ھاتبوونە دانان و وان وەکو لژنا نەزاھێ ھژمارەکا بادەکێن گەندەلیێ رادەستی ئەڤان لژنان کرن ژوان بادەکا بازرگانیێ دگەل تیرۆرستێن داعش و گۆت: “د کۆمبوونەکێ دا دگەل وەزیرێ ناڤخۆ سەرۆکێ لژنا حوکمەتێ ئاماژە دا بۆ وێ چەندێ کو کو پتری پازدە کەسان ب تۆمەتا بازرگانیێ دگەل تیرۆرستێن داعش ھاتینە دەستەسەرکرن، پشتی ھنگی مە چو پێزانین لدۆر کەسێن بازرگانی دگەل داعش کری نینە و نوزانین ھاتینە زیندانیکرن یان ھاتینە ئازادکرن و ھویردەکاری ل دەف مە نینن”.
ناڤھاتیێ ئاماژە دا وێ چەندێ ژی ئەو پێزانینێن بەحسێ کۆمبوونا لژنا نەزاھێ لدۆر بادەکێن گەندەلیێ دکەن چو راستی بۆ نینە و ھەر پەرلەمانتارەکێ داخویانی لدۆر ڤێ چەندێ دابن ئەو پێزانینێن کەسی نە و تشتەکێ فەرمی نینە.
ل گۆرەی زانیاریێن رۆژناما ئەڤرۆ کو ژ ژێدەرەکی وەرگرتین، بڕیارە لژنا نەزاھێ لدۆر بادەکێن گەندەلیێ و دەستەسەرکرنا ھژمارەکا کەسان ب تۆمەتا گەندەلیێ کۆمبیت و دوماھی پێشھاتێن ب رێڤەچوونا پڕۆسا چاکسازیێ گۆتوبێژ بکەن.