بارزانیێ نەمر چەڤەنگێ هەری بلندە گەلێ كوردستانێ شانازیێ پێ دكەت
ب هەلكەفتنا بیرەوەریا وەغەركرنا بارزانیێ نەمر، لقێ ئێك یێ پارتی دیمۆكراتی كوردستان بەیاننامەك بەلاڤكر و تێدا هاتیە: بارزانیێ مەزن چەڤەنگەكێ هەری بلندە كو گەلێ كوردستانێ شانازیێ پێ دكەت، ژ بەركو ژییێ خوە ژ بۆ خەبات و تێكۆشینا نەتەوی؛ ژ پێخەمەت مافێن خەلكێ كوردستانێ تەرخانكربوو.
د بەیانناما لقێ ئێك یێ پارتی دا هاتیە: «هەر مللەتەكی ل سەر گۆیا ئەردی، چەڤەنگ و هێمایێن خوە هەنە، كو شانازیێ پێ دكەن، گەلێ كوردستانێ ژی، ب دەهان هێما و سەمبۆلێن خوە هەنە و د وارێ بەرگری و خوەڕاگریێ دا، ب ستێرێن گەشێن ئەسمانێ خوە دهژمێرن. چەڤەنگێ هەری بلند بارزانی یێ مەزنە، ئەو كەسێ هەموو ژییێ خوە ژ بۆ خەبات و تێكۆشینا نەتەوی؛ ژ پێخەمەت مافێن خەلكێ كوردستانێ تەرخانكری، هەموو كوردستان ب مالا خوە زانی و هەموو خەلكێ كوردستانێ ب كەسێن خوە تەماشەكرین».
لقێ ئێك یێ پارتی ئاشكرا ژی كریە، هەر ژ دەستپێكا شۆڕەشێن بارزان و هەتا دوماهیك رۆژێن ژیانا خوە بێ راوەستیان خەبات كرییە و ناڤێ وەستیانێ نەزانییە، د چ كاودانان دا، چ د بەرتەنگ بن یان ژی د بەرفرهە بن، وی ئومێدا گەهشتنا ب ئارمانجان ژ دەست نەدایە؛ لەورا بۆ مە بوویە ئەو خواندنگەها شۆڕەشگێڕی و بەرخوەدانێ.
دیسا د بەیانناما لقێ ئێك یێ پارتی دا هاتیە: «ئەو مرۆڤێ هەری راستگۆ و پاقژ بوویە. چ دەمان ل سەر مافێن گەلێ خوە داگێڕان نەكری یە و بزاڤ ژی نەكرییە مافێن یێن دی ژی داگیر بكەت. ئەم فێركرینە ل مافێن خوە بخودان دەركەڤین و كەساتییا خوە ب پارێزین، وی گرنگی ب خواندن و زانینێ دایە و ژ بۆ مە د لێبۆرین و خوەڕاگری یێ دا پێشەنگە».
د دووماهیا بەیانناما لقێ ئێكێ پارتی دا هاتیە: «سلاڤ ل بیرەوەریا 44 سالییا مالئاڤاییا بابێ مە یێ رۆحی و نەتەوی. سلاڤ ل گۆڕا مشتی رۆناهی و دلۆڤانییا خودای یا بارزانی یێ نەمر بن. باشترین خەلات و وەفاداری ئەوە، ئەم ب راستی و دلپاكی خزمەتا گەل و وەلاتێ خوە بكەین. ل وی چاخی دێ گیانێ بارزانی و هەموو شەهیدێن كوردستانێ شاد و بەختەوەر بیت».
