بارزانی كورد كرنه ئێك
چوونا پێشمه‌رگه‌ی ل ناڤ ئاخا توركیا و ل رۆژا ئاڤاكرنا كۆمارا توركیا تشته‌كێ بچووك نینه، ژ بیر نه‌كه‌ین هه‌تا چه‌ند سال به‌ریا نها ژی توركیا بزاڤ دكرن كو ب رێیا هه‌رێما كوردستانێ شه‌رێ پارتیا كرێكارێن كوردستانێ بكه‌ت، لێ ئه‌ڤرۆكه مه‌سعود بارزانی كوردان دكه‌ته ئێك و توركیا ژی بۆ وێ ئێكه‌تیا كوردان بوو ده‌لیڤه‌یه‌ك، چونكو پێشمه‌رگه ب رێیا ئاخا توركیا چوونه كۆبانێ، پێشه‌وازیا كو كوردێن توركیا ل هێزا پێشمه‌رگه‌ی كری جاره‌كا دی نیشا دا كو كورد خوه وه‌ك ئێك نه‌ته‌وه دبینن و ل ده‌ف وان چو جوداهی د ناڤبه‌را پێشممه‌رگه و گه‌ریلا و شه‌رڤانان دا نینه و ژ به‌ر وێ یه‌كێ رۆژا كو پێشمه‌رگه چوونه كۆبانێ بۆ كوردان دێ بیته ده‌ستپێكا قۆناغه‌كا نوو و ئێدی ئه‌ز باوه‌ر ناكه‌م سیاسه‌تا كوردی وه‌ك به‌رێ بیت.
به‌ریا نها ژی من د گه‌له‌ك بابه‌تێن خوه دا دیار كریه كو بارزانی د ناڤ كوردان دا خوه‌دان سه‌نگه و هه‌تا سه‌ركردێن PKK یێن كو به‌ریا نها ب توندی دژبه‌ریا بارزانی دكرن نها رێزێ بۆ بریارێن وی دگرن و گوهداریا وی دكه‌ن و بارزانی د دبلۆماسیا خوه دا مرۆڤه‌ك گه‌له‌ك سه‌ركه‌ڤتی بوویه و شیا پشته‌ڤانیا هه‌موو جیهانێ بۆ كوردان ب گشتی و نها ژی بۆ كۆبانێ په‌یدا بكه‌ت، ئه‌و هێزا كو هه‌تا چه‌ند مه‌ه به‌ریا نها ژی هه‌موو وه‌لاتێن جیهانێ بۆ وان دگۆت تیرۆرست ب وێ سیاسه‌تا سه‌ركه‌ڤتی یا بارزانی نها جیهان هاریكاریا وان دكه‌ت، به‌لێ ئه‌مریك چه‌ك دانه وێ پارتیێ كو وه‌ك لقه‌ك PKK ل سووریێ دهێته دیتن و ژ به‌ر وێ یه‌كێ ژی ئه‌ردۆگان و سه‌ركردێن توركیا گه‌له‌ك توره بووینه و دبێژن بۆچی تنێ به‌حسێ كۆبانێ دهێته كرن و به‌حسێ باژارێن دی یێن سووریێ ناهێته كرن. دیاره كو وان عه‌ره‌بان سه‌ركرده‌ك وه‌ك بارزانی نینه كو بشێن ب ره‌نگه‌كێ سه‌ركه‌ڤتی پشته‌ڤانیا جیهانێ بۆ خوه بده‌ستڤه بینن.
توركیا ل هه‌مبه‌ر كۆبانێ سیاسه‌ته‌ك شاش برێڤه بر و ژ به‌ر وێ یه‌كێ ژی پشتی گه‌فێن ئه‌مریكا و وه‌لاتێن هه‌ڤپه‌یمان توركیا نه‌چار ما كو رازی بیت پێشمه‌رگه ل سه‌ر ئاخا وێ بچنه كۆبانێ و ره‌نگه جاره‌كا دی ژی هێزا پێشمه‌رگه بچیته كۆبانێ و ئێدی كوردان سنۆرێن د ناڤبه‌را خوه دا راكرینه و ئه‌ڤه ژی ب ده‌ستێ مه‌سعود بارزانی هاته كرن و بارزانی ب سیاسه‌تا خوه یا سه‌ركه‌ڤتی شیا كوردان بكه‌ته ئێك.
ژ رۆژناما خه‌به‌ر تورك هاتیه وه‌رگێران