بارزانی مهزنتره ژ شاباش و پهسنێ من.. ئهو سهمیانهكی سهمبۆلیه ژ گهلێ كورد ڕه
نزانم ب ڤێ ههلكهفتنێ چ دهرباری بیرانینا ۳۷ سالیا كۆچكرنا بارزانیێ نهمر ده ببێژم.. ؟! چكۆ ئهو مهزنتره ژ پهسنێ من.. تشتێ كو ئهز زانم و بیر و باوهریا من پێ تێ ئهڤ ئه: بارزانی سهمیانهكی سهمبۆلیه ژ نهتهو و نشتمانیا كوردی ڕه، ژ ڕامانێن كوردی یێن پێشڤهرۆ ڕه.. تا ڕادهیهكێ كو هێژی پێدڤیا مه ب كهسێن مینا وی ههیه، ههر و ههر وێ ههبه و وێ ناڤێ وی وهك سهمیان ژ نشتمانپهروهرێن كوردان ڕه بمینه.. ل سهر ڕێباز و پێڤاژۆیا وی یا پیرۆز و ب ڕۆناهی، وێ گهلێ كورد كاربن ژ خوه ڕه هێڤیێن بلند و بهرفرهه ئاڤا بكن.. ئهو ڕێبازا و پێڤاژۆیا كو ژ كوردان ڕه بوویه ژێدهرهك بنگههین. تهڤی ئهز نه د وێ باوهریێ ده مه كو ڕۆژێن دهربازبوویی، ڕۆژێن ئیرۆ یین و پێشهرۆژێ ل تهرازۆیا خوه خینن، لێ سوودهیا كو د ڕێباز و سهربۆرهیا بارزانیێ نهمر ده ههیه، گهلهكی گرنگ و پێویسته ژ كوردان ڕه.. و ههر وها ئهز نهباوهرم كو مرۆڤێن كورد وێ كاربن پێشكهڤن، بسهركهڤن و تشتهكی نوو ژ خوه ڕه پێكبینن بێیی ڕێبازا وی.. . ما وێ چ بهایێ نرخاندنا زنارهكی ههبه ژ چیاكی بلند وهك بارزانی ڕه.. ؟! بارزانی، چیاك بوو ژ چیایێن كوردستانێ، چیاكی ب دار و بهر بوو، ب چهم و جۆبار بوو، ب گهلی و نهوال بوو، چیاكی پۆز بلند و ب ههیبهت و ساو بوو.. ڕۆژهكێ ژ ڕۆژان، ئهڤ چیا ژ جهێ خوه نههات ههژاندن، نه پێشبهری باهۆزێن دژوار و نه بابلیسۆكێن گور و توند.. . وهك مه گۆت بارزانی چیاك بوو و چیا نامرن، بارزانی ژی نامره، ههر وێ د هۆش و ڕامانێن كوردان ده بمینه زندی.. ڤێ پاشیێ ژ بهر مهزنبوون و گرنگیا ناڤێ وی، د ناڤ گهلێ كورد و جیهانێ ده، دهولهتهك وهك ئامهریكا كو ژ مهزترین دهولهتێن جیهانێ یه، ناڤهندهك د زانكۆیا واشنتون ده دامهزراندیه ب ناڤێ (مهلا مستهفا بارزانی)، ب مهرهما كو بارزانی یهك ژ وان كهسایه، یێن كو تهڤ ژیانا خوه د بهر گهلێ خوه ده خهرجكرنه، ئهو ژی مینا نێلسون ماندێلا، شارل دیگۆل و جۆرج واشنتۆن ئه.. . بهلێ بارزانی مهزنتره كو ئهز شاباش و پهسنێ وی بدهم و وی بنهرخینم.. بارزانی چیایهك بوو، ناڤێ وی وهك ناڤێ چیاكی د ناڤ گهلێ كوردستانێ ده هاتیه بهلاڤكرن ب بلندبوون، ههیبهت و ئاسێبوونا خوه ڤه.. چهندی چهرخ و دهوران د سهر ڤی چیایی ڕه دهرباسبن، كهس نكاره ڤی چیایی ژ جهێ وی بلڤینه.. ئهرێ بارزانی سهمیانهكی سهمبۆلی یه ژ تهڤی گهلێ كوردستانێ ڕه. د ڤێ بیرانینێ ده، ئهز خوه تهمهنه و خووز دكم ژ ناڤێ وی ڕه و ناڤێ تهڤ شههیدێن كوردستانێ ڕه.
كۆنێ ڕهش / قامشلۆ 01/03/2016
