بارزانی و ئێكرێزی كرنا ناڤ مالا كوردی
د ناڤ گه‌رمیا گوَڕان كاریێن دژوارێن ئه‌وێن روو ب رووی عێراق و ده‌ڤه‌را رۆژهه‌لاتا ناڤین دبن ب گشتی و ل ده‌مێ هه‌ر پێكهاته‌ك ژ پێكهاته‌یێن وێ یێن نه‌ته‌وی، ئتنی، ئایینی و تائیفی بزاڤێ دكه‌ن بۆ ئێكرێزی كرنا رێزێن خوه و گوتارا خوه بۆ دابین كرنا مافێن خوه و ل روو ب روو بوونا ده‌رهاڤێژێن پاشه‌رۆژێ، خه‌ما ئێكرێری كرنا ناڤ مالا كوردی دمینت ئێك ژ گرنگرترین كێشێن روو ب رووی سه‌ركرداتیا رێزدار مه‌سعود بارزانی سه‌رۆكێ هه‌رێما كوردستانێ دبت، پشتی سه‌ركه‌فتنین گرنگێن هێزێن پێشمه‌رگه‌ی د به‌رووكێن شه‌ری دا تۆمار كرین ل دژی هۆڤه‌تیا ب ناڤ ده‌وله‌تا ئیسمێ و چه‌كدارێن وێ یێن ژبه‌ر ده‌ست ده‌ركه‌فتی و رزگاركرنا شنگالێ و وان سه‌ركه‌فتنێن مه‌زنێن دیبلۆماسیا كوردی ب ده‌سته‌ڤه ئیناین و په‌یوه‌ندیێن باش ل گه‌ل هیزێَن لۆكالی ل ده‌ڤه‌رێ و ده‌وله‌تێن جیهانێ ب تایبه‌ت هێزێن هه‌ڤپه‌یمان ل دژی تیرۆرێ، ژ به‌ر ڤان ئه‌گه‌ران گه‌له‌ك ئاسایی یه سه‌رۆك بارزانی پرۆژێ خوه یێ نیشتمانی بۆ ب دووماهی ئینانا كێشا سیاسی یا دروست كری ل سه‌ر یاسا سه‌رۆكاتی و رژێما سیاسی ل هه‌رێمێ به‌ره‌ڤاژی هه‌موو وان تۆمه‌تێن زارۆكانه ئه‌وێن هنده‌كان هه‌لبه‌ستین ل دژی جه‌نابێ وی، ل به‌رسینگا هێزێن سیاسی سێ هه‌لبژارده دانان و كیشكێ ژ وان هه‌رسێ خالان ب هه‌لبژێرن ئه‌و ژی:
1- د ناڤ خوه دا ل سه‌ر كاندیده‌كی رێك بكه‌ڤن بۆ سه‌رۆكاتیا هه‌رێمێ و ئاماده‌یا خوه بۆ پشته‌ڤانی كرن و هاریكاری كرنا وی یێ دهێته دیاركرن، دوپاتكر.
2- یان بچنه هه‌لبژارتنێن پێشوه‌خت و هه‌لبژارتنا سه‌رۆكی ئێكسه‌ر ژ لایێ گه‌لی ڤه بت ل گۆڕه‌ی ئه‌وا د دستووری و قانونێ دا هاتیه دیاركرن.
3- یانژی ئه‌ڤ ره‌وشه وه‌كو خوه بمینت هه‌تا هه‌لبژارتنێن سه‌رۆكاتی و په‌رله‌مانی ل سالا 2017 بهێنه كرن.
پرۆژێ رێزدار سه‌رۆكێ هه‌رێما كوردستانێ به‌ڕك كێشا ژبن پێن هه‌موو وان كه‌سێن گره‌و ل سه‌ر تێكدانا ئێكرێزیا نیشتمانیا كوردستانێ و ب لا ڕێ برنا جاددا كوردی دكه‌ن ب دروستكرنا كێشێن چ په‌یوه‌ندی ب گه‌وهه‌رێ به‌رژه‌وه‌ندیێن وی ڤه نه‌بن ئه‌ڤا هه چ ب ئه‌نجامێ نه‌زانینا وان بت ب پێشدا چوونا روودانا و باندۆرا وێ ل سه‌ر ره‌وشا هه‌رێمێ ب گشتی د ده‌مه‌كی دا هه‌رێم یا د روو ب روو بوونه‌كا چاره‌نڤیساز دا ل گه‌ل دڕنده‌ترین هێزا تیرۆرێ ل ده‌ڤه‌رێ یان ژی ب هاندانا هێزێن ده‌ره‌كه یێن دخازن ئه‌زموونا هه‌رێما كوردستانێ و پرۆژێ وێ یێ دیمۆكراتی له‌كه‌دار بكه‌ن.
ده‌ستنپێشخه‌ریا رێزدار بارزانی بۆ چاره‌سه‌ر كرنا كێشێن ناڤبه‌را هێزێن نیشتمانی ئه‌گه‌ر ژ لایێ هێزێن سیاسی ڤه ب باشی هاته بكار ئینان دێ لاپه‌ره‌كێ نوو نه‌ته‌نێ د په‌یوه‌ندیێن نیشتمانی دا ئێته ڤه‌كرن به‌لكو د پێشڤه برنا خه‌باتا نیشتمانی و تۆكمه كرنا ئێكرێزیا ناڤمالا كوردی و ل دووماهیێ روو ب روو بوونا ده‌رهاڤێژێن پاشه‌رۆژێ ز گۆڕانكاریێن دهێنه چاڤه‌رێ كرن، ب ره‌نگه‌كی كو په‌رژه‌وه‌ندیێن گه‌لێ كوردستانێ بهێنه دابین كرن، زێده‌باری كو ئه‌ڤ پرۆژه ب خوه په‌رچدانه‌كا ئاشكه‌رایه بۆ هه‌ر كه‌سێ دخازت د كۆربه‌قان دا مه‌له‌ڤانیا بكه‌ت و گره‌و ل سه‌ر دروست كرنا ره‌وشه‌كا جدودابوون و ژ هه‌ڤدوور كه‌فتنێ و هه‌تا بگه‌هته ره‌وشا شه‌رێ براكوژیێ د ناڤ جڤاكێ كوردستانێ دا كری.
هه‌روه‌سا فه‌ره به‌لكو پێدڤیه ل سه‌ر حوكمه‌تا فیدرالی ئه‌ڤا ل كوردستانێ روو دده‌ت تێبگه‌هت و ده‌ست ژ هزر و مالخولیانیێن پارچه‌كرنا جڤاكێ كوردستانی و گه‌رم كرنا ناكۆكیێن حزبی یێن بێ واته، به‌رده‌ت و له‌زێ ل پرۆسا ئاشته‌واریا نیشتمانی و راكرنا عمبارگۆیێ ل سه‌ر كوردستانێ و ل راستی هاتنا ب كردار ل خازته‌كێن كوردان بۆ پاراستنا ئێكرێزیا نیشتمانیا عێراقی و ئاشته‌زاریا جڤاكی و دابینكرنا پێداویستیێن روو ب روو بوونا تیرۆرێ و هشك كرنا سه‌ره‌كانیێن وێ و ئه‌گه‌ر نه پێدڤیه خوه به‌رهه‌ڤ بكه‌ت بۆ دان پێنان ب كۆمارا كوردستانا برێڤه، چنكو هه‌ر چاره‌سه‌ره‌كا دی ژبلی خه‌ون رۆژك و هه‌لچوونێن و زارۆكینی یێن نه‌ته‌وه‌په‌رێسی و تائیفی یێن ده‌م ب سه‌رڤه چوویی ئه‌ڤه بیرا كوردان ل داخازا سه‌رۆك كۆمارێ به‌رێ دئینن ده‌ما گوتی: “بۆ چاره‌سه‌ركرنا كێشا كوردی دێ چیا ب بلدوزه‌را راست ڤه‌كه‌ین”!
وه‌رگێران: ئه‌ڤرۆ
ژ مالیه‌رێ ئیلاف هاتیه وه‌رگرتن
