بارودوخ دخازیتە هەڤگرتنێ
ئحسان ئامێدی
هەر تاکەکێ هشیار و ناڤەندێن نافخویێن هەرێمێ و عیراقی و هەرێمایەتی و نیڤدەولەتی باسێ رەوشا نوکە یا هەرێما کوردستانێ و کێشەیێن موچەی و بودجەی و هنارتنا نەفتێ و پروسەیا هەلبژاردنێن پەرلەمانی و بریارێن نەدەستوریێن دادگەها بناڤ فیدرالی دژی هەرێما کوردستانێ دکەن، و وەسا نیشا ددەن کو حکومەتا عیراقێ لبن باندورا ئیرانێ و سیاسەتا شوفینیست و تایفەگەری یا پتریا حکمدارا تایفەگەری دڤێن هەرێما کوردستانێ لاوازکەن و ئیرادا وێ لێ بستینن، هەروەسا زێدەگاڤیێن دەولەتێن هەرێمایەتی و نوکەرێن وان ل دەڤەرێ بارودوخی ئالوزدکەن و مەترسیێ لسەر دروست دکەن، و هویەکێ ڤان ئالوزیان و گڤاشتنان ڤەدگەرینن بو ژێکڤەبوونا نافمالیا هەرێمێ و ناکوکیێن لایەنێن سیاسی و هەڤدژگرتنا سەنگەران و سکالا ل هەڤکرن دژی بەرژەوەنێن هەرێما کوردستانێ تا وێ رادێ شادبوەنا خۆ دیارکەن ب کوما وان گڤاشتن و بریار و پێرابوونێن نەدەستورێن دژی هەریما کوردستانێ!، ئێدی زەمینە بۆ دژمنا خوشتر لێ دهێت سیاسەتێن خۆیێن دژمنکارانە برێڤەببەن.
کێشەیێن کوردستانێ گەلەکن، سیاسینە، ئابورینە، هزرینە و هتد. ل بەرچاڤدانن لڤی سەردەمی هشتا شوفینیەت ستەم و زوریێ یی ل گەلێ کوردستانێ دکەن و ناهێلن کورد ب زمانێ خۆ باخڤن و جەژن و بیرەوەریێن خۆیێن نەتەوەیی زیندی کەن، دهەمان دەمدا هندەک لایەنێن ژڤی توخمی هەنە ناهێلن ب ئازادانە چالاکیێن لایێن دی یێن ژتوخمێ خۆ ل دەڤەرێن ژێر دەستهەلاتا وان بهێنەکرن!. دێ بێژین داگیرکەر دژمن و نەیارن دلوڤانی ل دەف وان نینە یا پێ چیبیت دێ ستەم و زوریێ دژی کورد و کوردستانێ بکارئینن، لێ دڤێت لایەنێن سیاسیێن هەرێمێ دلوڤان بن دگەل هەڤدوو و خەلکێ کوردستانێ، و بەرژەوەندین هەرێما کوردستانێ ل سەر هەر بەرژەوەندەکێ بێخن و بزانن بەرژەوەند و چارەنووسی وان ب هەرێما کوردستانێ ڤە گرێدایە، ئەگەر هەرێما باش بیت دێ باشی بۆ هەمیان بیت، و ئەگەر خراب بوو دێ خرابی بۆ هەمیان بیت، ئەڤجا دڤێت هەست ب بەرپسیاریا خۆ بکەن و ب ئەرکێ خۆ یێن نەتەوەیی و نیشتیمانی و مروڤی رابن پێناڤی پاراستن و گەشەکرنا هەرێما کوردستانێ.
مێژوویا بزاڤا سیاسیا کوردستانێ وێ نیشا ددەت هەر دەمێ بزاڤا سیاسی هەڤگرتی، مللەت یی ئارام بووی و وورەیا خەلکی یا بلندبووی و هیڤی و ئومێدێن گەشبووین و سەرکەفتنێن بدەستڤەهاتین، و بەروڤاژی هەردەمی ناکوکی چێبووین ژێکڤەبوون و دووبەرەکی کەڤتیە دناڤدا ئێدی هیڤی و ئومێد تێکدچوون و مورالا خەلکی د شکەست و لاوازیی د کەفتیە د بزاڤا سیاسیدا و پاشڤەدچوو، و سەربورا بەرەیا کوردستانی نمونەیەکا سەرکەفتیە، هەرچەندە ئاشبوونا نیشتیمانی و پێکئینانا بەرەی کوردستانی د کاودانەکێ سەخت و دژواردا چێبوو، لێ شیا خەلکی ب هیڤی بکەت و مورالا وی بلندبکەت و پاشی سەرکردایەتیا سەرهەلدانا جەماوەری بکەت و کوردستانێ رزگارکەت و هەریما کوردستانێ دامەزرینیت، ئێدی هەمی لایەنێن سیاسی و ب خەلکی کوردستانێ ڤە سەرفراز و سوود مەندبوون بڤی دەستکەفتیێ نەتەوەیی.
بەلێ بارودوخ ئالوزە و مەترسیێن راستەقینە هەنە، لێ دهەمان دەمدا هشیاری و هەستکرن ب بەرپسیاریێ و ئیرادەکا چارەسەرکرنێ ژی هەیە لەوان ب هیڤینە ئیرادا چارەسەرکرنێ خورت ببیت دا ژڤان ئالوزیان رزگاربین، و لایەنێن سیاسی دخازتینە وێ ئیرادێ کاراکەن و چالاککەن، و رەشی ئارام و سەقامگیرکەن.
