بارڤهكرنا رۆلێن وهلاتێن ئورۆپى د سياسهتا نێڤدهولهتى دا
د ههر سازیهكا جڤاكى، سیاسى، ئابوورى ل جیهانێ، دابهشكرنا رۆلان كارهكێ گرنگه ژبۆ برێڤهبرنا كاروبارێن رۆژانه و رێكخستنا وان كو ب شێوهیهكێ وهسا بیت كو د خزمهتا گشتى دا بیت، بهردهوامى و پێشڤهچوونا ههر سازیهكێ گرێدایه ب دانانا پرۆگرامهكێ رێكخستى و دابهشكرنا رۆلان د ناڤبهرا جهێن كاریگهر و بهرههڤیا ههر رودانهكێ بهێته كرن، پێدڤى یه ههر كهسهك كارێ خوه بزانیت و ههر ئێك ژى تمام كهرێ یێ دى بیت.
ههكه دابهشكرنا ڤان رۆلان ل دووڤ وێ ئاخفتنێ بیت كو دهێته گۆتن”كهسێ ژ ههژى بۆ جهێ ژ ههژى” دێ ئهنجام و ئایندهكێ گهش ههبیت
ل ڤێره من دڤێت بهحسێ رۆلێ وهلاتێن ئێكهتیا ئۆرۆپا بكهم كو چاوان ههر چهند وهلاتان رۆلهك پێ هاتیه سپاردن و ههر ئێك ژ وان چاوا بازارێ خوه پهیدا دكهت و چاوا رۆلێن خوه دگێرن و دبنه تمامكهرێن ئێك دو، ئهگهر ب سادهیى سهحكهینه ڤان وهلاتان دێ بینن، ولاتێن ئاشتیخوازن و ل دووڤ یاسایێ دچن و ل سهر ئاستێ ناڤخوه و ژ دهڤهر كهسێن ژ ههژى ئێخستینه د پۆستان دا و كارتێكرنهكا باش ل سهر ئاستێ جیهانێ دروست كرینه، ل سهر ئاستێ دهرڤه ڤان وهلاتان ل سهر بنهمایێ بهرژهوهندیان سیاسهتا خوه ئاڤاكریه، پشتى شهرێ جیهانى یێ دوێ، گهلهك ژ ڤان دهولهتێن ئۆرۆپى ژ ئالیێ سیاسى، ئابوورى و ئاسایشێ ڤه هاتنه لاوازكرن، لێ پشتى بزاڤهكا زور ئێكگرتنهكا ئابووریا بهێز د ناڤبهرا پرانیا ولاتێن ئێكهتیا ئۆرۆپا هاته دروستكرن و ژ ئهگهرێ دلسۆزیا وان و مفا وهرگرتن ژ شهران، ئێكگرتنهكا سیاسى ژى پهیدابوو و 28 دهولهتان ئێكهتیا خوه ب ناڤێ ئێكهتیا ئۆرۆپا ئاڤاكر، بازاركرن و كارێ ههڤپشك ژ ئامانجێن سهرهكى یێن ڤان دهولهتان بوویه. وهلاتێن ئۆرۆپى بۆ ههر وهلاتهكێ ئۆرۆپى رۆلهك دیاركریه، بۆ نموونه ئهلمانیا، فرهنسا و بریتانیا ناڤدارن ب هێزا خوه یا لهشكرى و مرۆڤى و سالانه چهندین جۆرێن چهكان بهرههم دئینن و رۆلێ لهشكرى پێ هاتیه سپاردن و د ئاریشێن جیهانى دا، ب رۆنى دهێته دیتن، وهلاتێن وهكو ئیتالیا و ئسپانیا ژ وان وهلاتانه كو هاتینه نیاسین ب وهلاتێن گهشتیارى، سالانه ملیۆنهكا گهشتیار قهست دكهنێ و ئابوورێ خوه ل سهر ئاڤاكریه، هندهك وهلاتێن دى ژى وهسا دیاركرینه كو ئاسایشا وان 100% مسوگهره كو ئهوژى سۆیسرایه، ژ بهر ڤێ چهندێ ژى پرانیا وهلاتان پارێن خوه ل وێ دهولهتێ ددانن، هندهك وهلاتێن دى ژى رۆلێ وان ئهوه كو كۆنفرانس لێ بهێنه گێران وهكو نهمسا و پورتوگال و سالانه ب سهدان كۆنفرانس لێ دهێته ئهنجامدان.
وهلاتێ نهرویج و سوێد ژى خوه وهك وهلاتێن بێ لایهن دایه نیاسین و د شهڕان دا، رۆلێ ناڤبهریێ دگێرن، ئانكو ههر وهلاتهكێ رۆلهكێ پێ هاتیه دا و ئێك و دو تمام دكهن، ههر ئهڤ چهنده ژى بوویه ئهگهر كو ڤان وهلاتان پێكڤه هێزهكا سیاسى، ئابوورى ل سهر ئاستێ جیهانێ ههبیت، ل ڤێره ئهگهر ب پرسین ئهگهر شهر و ئالۆزى نهمان دێ رۆلێ هندهك ژ ڤان دهولهتان چ لێ هێت، ئانكو دێ بازاركرن دێ ههر یا بهردهوام بیت، ب هزرا من ههكه شهر و ئالۆزى نهمان وهك پێدڤى رۆلێ ڤان دهولهتان نامینیت ئانكو چهك ناهێته فرۆتن و هۆتێلێن هندهك وهلاتان دێ ڤالا بن ژ كۆنفرانسێن ئاشتیێ، خهلاتێن ئاشتیێ ژى بۆ هندهك دهولهتان نامینن، بانكێن هندهك دهولهتان ژى دێ ڤالا بن، ل ڤێره یا گرنگه ئهم كورد ژى بزانین دێ چاوا رۆلان دابهش كهین و مفا ژ سهربۆرێن وهلاتان بینین، ئهڤرۆ كوردستان ل سهر چار پارچان هاتیه پارڤهكرن، بلا ههر پارچهك رۆلهكێ ببینیت، كو د ئایندهى دا، رۆلێن ههر چار پارچان دێ خزمهتا ئێكگرتنهكا سیاسى، ئابوورى یا كوردستانێ كهت.
