بارێ حوكمهتا داهاتى یا ههرێمێ گرانتر لێ نهكهن!
بهدرخان عهبدولكهریم
ل رێكهفتى 3/12/2018 و ل كۆمبوونا سهركردایهتیا پارتى دیمۆكراتى كوردستان ب رێز مهسرۆر بارزانى وهك بهربژارێ پارتى بۆ پێكئینانا كابینا نوو یا حوكمهتا ههرێمێ هاتیه دهست نیشانكرن و ب رێز نێچیرڤان بارزانى بۆ سهرۆكاتیا ههرێمێ هاتیه بهربژاركرن و ههر ل وێ رۆژێ حهتا ئهڤرۆ زۆر پرس و بابهت هاتینه تێكهلكرن و زۆر داخوازى هاتینهكرن كو دڤێت حوكمهتا داهاتى یا ههرێمێ ل سهر راوستیت و كار ل سهر بكهت!! ئهڤجا ئهڤ چهندا ههنێ ب بهرنامه دئێتهكرن بۆ پتر گرانكرنا بارێ كابینا داهاتى و حازركرنا جادێ بۆ رووبرووبوونا وێ!! یانژى بۆ وان هیڤى و ئۆمێدێن بۆ خهلكى دروست بوین كو بارێ ئهمنى یێ ههرێمێ و سهقامگیریا وێ كو مهسرۆر بارزانى بهرپرسێ ئێمناهیێ بۆ رهنگڤهدانا خوه ههبیت ل سهر حوكمهتان و بابهتێ خزمهتگوزاریا و چارهكرنا كێشهیان!! لهورا ئهڤ فشارێن ههنێ د بارێ حوكمهتێ دا زۆر گرانتر لێكهت و تووشى بهرپسیارهتیهكا مهزنتر بیت.
گومان تێدا نینه كو د كابینێن حوكمهتێ دا یێن بهرى نها و تایبهت ل چار سالێن دهربازبووى كو نێچیرڤان بارزانى سهرۆكێ حوكمهتێ بۆ كارێن مهزن هاتینه ئهنجامدان و بریارێن گرنگ هاتینه دهركرن و سهرهرایى وان ههمى فشار و قهیران و شهران و بارگرانیا ئاوارا و قهیرانا دارایى و فشارێن بهغدا حوكمهتا ههرێمێ شیا زۆرهك ژ وان قهیرانان چارهكهت و زۆرهك ژ وان بهربهست و فشاران ژناڤببهت و خۆراگر بیت ل بهرامبهر ههموو كیشه و فشاران تایبهت پشتى سهرۆكێ ههرێمێ مسعود بارزانى دهست ژ پۆستێ خوه بهردایى ل دووماهیا سالا 2017 و ئهو بارگرانیه ژى ههر بۆ حوكمهتا ههرێمێ ما، لهورا ئهو كاودانێن سهخت و دژوار و قهیرانێن مهزن یێن بهرۆكێ ههرێمێ گرتین تایبهت پشتى خیانهتا 16 ئوكتوبهرێ و خۆراگرتنا حوكمهتا و دهربازكرنا وان كاودانا و شكاندنا ئابلۆقا د بارێ كابینا داهاتى گران كهت كو ههرێمێ ژ ڤێ قووناغێ بهر ب قووناغهكا باشتر ڤه ببهت.
ئهگهر د بهرنامێ حوكمهتا داهاتى دا بریار ئهو بیت ژمارا وهزارهتان بێته كێمكرن و جڤاتێن پارێزگههان بێنه ههلوهشاندن و جڤاتێن باژێرڤانیان بێنه خورتكرن و ب بهرنامه و قانوون كار ل سهر نههێلانا گهندهلیێ بێتهكرن و ب دروستى چاكسازى بچنه د وارێ جێبهجێكرنێ دا ل وى دهمێ پێدڤیه چهندین قانوون بێنه راستڤهكرن و ههلوهشاندن ب رێیا پهرلهمانى و ئهڤێ چهندێ ژى پێدڤى خواندن و تێگههشتنێن نوو ههیه و رێكهفتنێن نوو د ناڤبهرا لایهنێن سیاسى و ئهڤه ژى دێ دهمهكێ زۆر پێ چیت حهتا دبنه قانوون و دهردكهڤن و دئێنه جێبهجێكرن و د ڤان قانوون و گوهۆرینا رهنگڤهدانا خوه ههبیت ل سهر یهكهیێن ئیدارى ل پارێزگهه و دهستههلاتێن پارێزگههان. لهورا گرنگه بزانین كو حوكمهتا داهاتى دێ بۆ ماوهكى د ل سهر ههمان رێچك و بهرنامێ حوكمهتا بهرى نوكه چیت حهتا كو بابهتێ سهرۆكاتیا ههرێمێ ئێكلا دبیت و كێشێن د ناڤبهرا ههرێمێ و بهغدا دا د چارچووڤێ رێكهفتنهكێ دكهڤنه سهر رێیا چارهسهریێ كو سهرۆك بارزانى د سهرهدانا خوهدا بۆ بهغدا ئهڤ چهنده ئێكلاكریه! ئهڤه زێدهبارى كێشێن مهزن یێن دهڤهرێ و فشارێن ل سهر ئیرانێ و كێشێن مهزن ئهوێن ل پارێزگهها سلێمانیێ ههین و چارهنڤیسێ پارێزگهها كهركووكێ و ناڤچێن مادێ 140 ژ دستوورى و ئاواران كو ڤان كێشهیان ههمووان كارهكێ مهزن و ماوهكێ درێژ دڤێت حهتا چارهسهردبن. بهرامبهر ڤێ چهندێ خهلكێ ههرێمێ تهحمولا ههر تشتهكى كریه د ڤان سالێن دهربازبووی دا و سهرهرایى ههموو قهیران و شهر و فشاران خۆراگر بوویه و بهرهڤانى كریه، لهورا بهرامبهر ڤێ چهندێ چاڤێ وى ل كابینا داهاتیه كو قهرهبۆیا ڤێ چهندێ بكهت و بارێ وان یێ ئابوورى باشتر لێبكهت و خزمهتگوزاریێن پێدڤى دابینكهت و دادپهروهریا جڤاكى دروست ببیت و راسته ئهڤه مافێن رهوا یێن خهلكینه، لێ بارگرانیهكا ئێك جارا مهزنه بۆ حوكمهتێ د ڤێ قووناغا ههستیار دا.
لێ ب دیتنا من بارێ ههره مهزن و گران یێ حوكمهتا ههرێمێ و سهرۆكاتیا ههرێمێ بۆ چار سالێن داهاتى د ئهنجامێن ریفراندۆمێ دا بن كو بزانن ئهرێ بهغدا دێ یا پێگیر بیت ب دستوورى و چارهكرنا كێشهیان نه!! و ئهڤ بابهته ببیته پرسهكا نیڤدهولهتى تایبهت پشتى ههموو ههولان ل گهل بهغدا شكهستن ئیناى و دهستێن ههرێمێ و نیڤدهولهتى دیاربووین و بارودۆخ گههاندیه ڤى ئاستێ مهترسیدار! و ئێدى ئهڤ چار سالێن داهاتى د سالێن ئێكلاكهر بن و د بریارێن مهزن و گرنگ تێدا ئێنهدان. ئهڤه ئهگهر ئهم بزانین كو دهڤهر ههموو یا د قووناغهكا زۆرا ههستیار و مهترسیدار دا دهربازدبیت و ههر چركهیهكێ چاڤهرێ شهرێن مهزن دئێتهكرن كو رووبدهن!! و بارگرانیا ههرا مهزن ئهوه كو ههرێم یا پاراستى بیت و نهكهڤیته بهرێ چ لایهنان ب وان شهڕێ دئێنه چاڤهرێكرن ل دهڤهرێ.
