بازارێ مێركاتۆیێ دەستپێكر ستێركا یانەیێن بەغدایی ل یاریزانێن دهۆك، زاخۆ و هەولێر هاتیە گرتن
بەری ب دووماهی هاتنا خولا تەپا پێی یا ئیراقێ بۆ یانەیێن پلا نایاب ب دو گەڕان بازارێ مێركاتۆیێ بۆ گرێبەستێن یاریزانێن خولێ دەستپێكرییە و پرانییا یانەیێن بەغدایی و پارێزگەهێن ئیراقێ بزاڤێ دكەن باشترین یاریزانێن خولێ رازیبكەن و نووكرنا گرێبەستان یاریزانێن خوە بكەن، چەند یاریزانێن یانەیێن دهۆك، زاخۆ و هەولێر د كڤانێ دانە و ستێركا خوە ل بەر گرتینە.
بازارێ یاریزانێن دهۆكێ گەرمە
ل دووڤ دەنگۆیێن بەلاڤبوویی و ژێدەرێن جودا، د هاڤینا گەڕا نوكە دا بازارێ یاریزانێن دهۆكێ ژی گەر بوویە، پیشەكارێ كۆتیڤۆاری زاكێری گراهێر یانیك و كوڕێ سێمێلێ و ڕەڤەندا كورد ل هۆلەندا رێوان ئەمین و ژیار گۆڤەند ل بن ستێركا یانەیێن جەوییە، شورتە، زەورا و تەلەبە دا و ئۆفەرێن وان د ناڤبەرا 150 ملیۆن هەتا 200 ملیۆن دیناران هاتینە زانین، ئۆفەرا یانەیا زەورا ب 120 د‌ولاران، تەلەبە 130 هزرا دۆلاران، جەوییە گەهشتیە 100 هزار دۆلان و یانەیا شورتە ئۆفەرەكا زێدەتر 150 ملیۆن دیناران دیاركرییە، هەروەسان چارەنڤیسێ هەرسێ یاریزانان بەیار ئەبۆبەكر، حەسەن عیماد و محەمەد مەعەن دیار نینە ئەوێن ب شێوەیێ خواستن بۆ ئێك وەرز هاتینە دهۆكێ، ژلایەكێ دووڤە پیشەكارێن تیمێ نۆرۆ سۆلۆ و موسێس لۆكاس مانا خوە بۆ وەرزێ بهێت ئێكلا نەكرینە، دیسان چەند یاریزانێن دی هەنە نموونە محەمەد سەعید ژی مانا خوە دگەل تیمێ دیار نەكریە، ب فەرمی پیشەكارێ بەرێ یێ تیمێ برێنس ئۆبۆكۆ پەیوەندی ب یانەیا محەمەدانی یا هندی كر.
هەلوەستێ یاریزانێن زاخۆ ئێكلا نەبوویە
دەنگۆیێن بەلاڤبوویی كو هەردو یانەیێن وەشمی و سقۆر یێن سعۆدیێ بزاڤێن رازیكرنا هێرشبەرێ زاخۆ فەرحان شكۆری دكەن، هەروەسا یانەیێن تەلەبە، جەوییە و شورتە بزاڤێن دكەن گرێبەستێ دگەل چەند یاریزانێن زاخۆ ئیمزابكەت ژ وانا گۆلپارێز محەمەد سالح، ژلایەكێ دووڤە راهێنەرێ چەستەیی مستەفا جاسم گرێبەستا یانەیا مەسفۆت یا ئیماراتی ئیمزاكر، دەنگۆیێ بەلاڤبوویی ل سەر چوونا پیشەكارێن وێ یێ ئۆردنی حیجازی ماهر، یێ كۆتیڤۆاری بازی ئارماند بازی بۆ یانەیێن دەرڤەیی ئیراقێ لێ چو رۆهنكرن ژی نە هاتینە بەلاڤكرن.
ژلایەكێ دووڤە ل یانەیا هەولێرێ ئۆفەر ژ یانەیا شورتە یا بەغدایی بۆ یاریزان رەوا یۆسف هاتیە و دبیت پشتی یاریا ئەڤرۆ خوە ئێكلا بكەت، دیسان ئۆفەرەك ژ یانەیا ئەبها یا سعۆدیێ بۆ شێركۆ كەریم هاتیە لێ دووماهی زانیاری دبیت ئەو مانا خوە دگەل یانەیا هەولێر ئێكلا بكەت.
