بازاڕێ فرۆتنا مۆخل و بێژینگان یێ كێم بووی
هەرهین محەمەد:
وەعدوللا كەریم، كو كارێ چێكرنا مۆخل و بێژنكا دكەت و خەلكێ كومەلگەها (ئادارە) یا كو هوستا لێ دژین، د دیدارەكێ دا بۆ رۆژناما ئەڤرۆ گۆت ژمێژەیە ئەز ڤی كاری دكەم و ژباب و باپیرێ خوە فێربوویمە
و چێكرنا وان بۆ من گەلەك یا ب ساناهی یە و دەمێ بیست خولەكاندا سێ بێژنك من چێكرینە و بەری دەستپێبكەین دارێ سپیندارێ ئەم تەنك دكەین و دكەینە د ئاڤێ دا هەتا نەرم دبیت و خواردكەین و هشك دبیت و دكەینە مۆخل و بێژنك و گەلەك جۆرێن مۆخلان هەنە و هەر ئێك بۆ كارەكی ب كار دهێت و مە ل دووڤ داخوازییێن خەلكی چێدكەین.
هەروەسا گۆت: د بەرێ دا كارێ خەلكی ل سەر مۆخل و بێژنكا بوو كارێ خوە پێ دكر و نوكە ئەڤ كارە كێمتر لێ هاتیە و ل كارگەهان ئار دهێتە مۆخلكرن و خەلكێ مە گەلەك كێم دكڕیت و نەچارین ب ئەرزانی ژی ب فرۆشین و بەرێ دەمێ مە ل گوندا دفرۆتن مە ب پارە دان، یان ب كەلوپەلان دگۆهاڕاتن.
