بازاڕێ شەڤێن رەمەزانێ ل دهۆكێ دێ هێتە ڤەكـرن
دهۆك، دلۆڤان ئاكرەیی:
بەرپرسێ راگەهاندنا رێڤەبەریا گشتی یا گەشت و گوزارا پارێزگەها دهۆكێ دیاركر، ل ژێر چاڤدێریا پارێزگارێ دهۆكێ ب هەماهەنگی ل گەل رێڤەبەریا گشتی یا گەشتوگوزارێ و فاملی مۆل ل دهۆكێ، بازارەكێ مەزن ب هەلكەفتا هاتنا مەها رەمەزانا پیرۆز دێ هێتە ڤەكرن.
شەمال جەعفەر، بەرپرسێ راگەهاندنا رێڤەبەریا گشتی یا گەشت و گوزارا پارێزگەها دهۆكێ بۆ رۆژنامەیا ئەڤرۆ گۆت: «پتر ژ 100 كۆمپانی د بیاڤێن جودا دا، ل 108 جهێن بازرگانی پشكدارن، ئەڤ پڕۆژە بوویە ئەگەرێ پەیداكرنا نێزیكی 300 دەلیڤەیێن كاری بۆ گەنجێن پارێزگەها دهۆكێ ژێ كچ و كوڕان».
گۆت ژی: «هەمی كۆمپانی هاتینە پێگیركرن، كو ب چو رەنگان وەلاتیان نەخاپینن و بهایان بلند نەكەن، دیسا لژنەیەكا تایبەت ژی بەردەوام دێ د ناڤ بازاری دابیت بۆ چاڤدێریكرنا رەوشێ، هەژمارەكا زۆر ژ كۆمپانیان بەرهەڤیا خۆ دیار كریە كو د رۆژێن رەمەزانێ دا ئۆفەر و داشكاندنێن تایبەت بۆ وەلاتیان بكەن».
