بازرگانیا د ناڤبەرا هەرێم و توركیا دا 50%ێ كێم بوویە
ئەڤرۆ
هەولێر، قائید میرۆ:
سەرۆكێ ژوورا بازرگانی و پیشەسازیا دهۆكێ ئاشكرا كر، ژ ئەگەرێ بیڤەلەرزا مەها بۆری یا توركیا لڤینێن بازرگانی د ناڤبەرا هەرێم و توركیا دا 50%ێ كێم بوویە و دبێژیت: كارگەه هاتینە گرتن و پێشبینی دهێتە كرن رەوش بەر ب ئاسایی بوونێڤە بچیت.
ئەیاد حەسەن، سەرۆكێ ژوورا بازرگانی و پیشەسازیا دهۆكێ بۆ رۆژناما ئەڤرۆ دیار كر، ژ ئەگەرێ بیڤەلەرزا 6ی مەها شواتێ لڤینێن بازرگانی كێم بووینە و گۆت: «ژ بەر كاریگەریێن بیڤەلەرزێ خەلك ئاوارە بووینە و هەژمارەكا بەرچاڤ یا كارگەهان هاتینە گرتن و كار ناكەن، ئەڤە ژی بوویە ئەگەر لڤینێن بازرگانی د ناڤبەرا هەرێما كوردستانێ و توركیا دا 50%ێ كێم ببیت، چونكی خەلك ناچیتە سەر كاری و زێدەتر مژوولی ژیانا خوە نە».
ئەیاد حەسەن گۆتژی: «هەرچەندە زێدەتری مەهەكێ ل سەر كارەساتا توركیا دەربازبوویە، بەلێ هێشتا كاریگەریێن بیڤەلەرزێ ل سەر خەلكێ ئەڤی وەلاتی ماینە و رەوشا دەڤەرێن بیڤەلەرزێ ڤەگرتی ئاسایی نەبوویە، بەلێ ئەم پێشبینی دكەین هێدی هێدی رەوش بەر ب ئاسایی بوونێ بچیت و دێ كاریگەری ل سەر لڤینێن بازرگانی ژی هەبیت، ل گەل ڤێ چەندێ ژی دەم پێدڤیە بۆ ئاسایبوونا رەوشێ».
