بازرگانی ب مرۆڤان یا بەردەوامە
هەولێر، قائید میرۆ:
پارێزەرەكا شیرەتكار بو روژناما ئەڤرو ئاشكرا كر، ل گورەی سەردەمێ نوكە بازرگانی ب مرۆڤان دهێتە كرن و مینا سەردەمێ كۆیلایەتیێ بازرگانی ب مرۆڤان یا بەردەوامە، بەلێ پێشكەفتنێن ژیانێ گۆهۆڕین پەیدا كرینە و نوكە بازرگانی ب مرۆڤان ب شێوازەكێ سەردەمیانە دهێتە كرن.
پارێزەرا شیرەتكار پرۆشە قەلەندەر، بۆ رۆژنامەیا ئەڤرۆ دیار كر، بازرگانیا ب مرۆڤان هەر د سەردەمێ كەڤندا هەبوویە و بەرێ زێدەتر وەكی كۆیلە بازرگانی ب مرۆڤان هاتیە كرن، بەلێ د سەردەمێ نوكەدا گۆهۆڕین ب سەردا هاتیە و بازرگانی كرن ب مرۆڤان ب شێوەیێن جودا یا بەردەوامە و گۆت: (لەوڕا دشێم بێژم كۆیلایەتیا سەردەم هەیە و ب مەرەما كڕین و فرۆتنێ بازرگانی ب مرۆڤان دهێتە كرن، مینا هەر كەلوپەلەكی بازرگانی ب مرۆڤان دهێتە كرن، هەمبەر پێدڤیێن هەر مرۆڤەكی بازرگانی ب مرۆڤان دهێتە كرن).
پرۆشە پارێزەرا شیرەتكار دیار كر ژی،ئێك ژ وان بازرگانیێن سەردەمێ نوكە ب مرۆڤان دهێتە كرن بازرگانیە ب رێیا سێكسی، ئەڤە ئێك ژ وان جورێن بازرگانیێ بۆ تێركرنا حەزێن خوە یێن سێكسی و د هەمبەردا دبیتە ژێدەری ماددی بۆ هندەك مرۆڤان، زۆر جارا ژی قوربانی دهێنە بكارئینان و خاپاندن هەتا ب زۆری كارێ سێكسی دگەلدا دهێتە كرن و گۆت: (بكارئینانا مرۆڤان بۆ كاری هەمبەر پارەیەكێ كێم یان ژی بێ بەرامبەر كار ب مرۆڤی دهێتە كرن و زۆر جارا دەست ب سەر ناسنامە و پاسپۆرت و بەلگەیێن پێدڤی دهێتە گرتن هەتا ئەو كەس بهێتە نەچار كرن كار بكەت بێ بەرامبەر بێگومان ئەو كار ژی ب نەچاری دهێتە كرن و بن گڤاشتنێن زۆر یێ نەچارە كار بكەت هەیە ژی بەرامبەر دانا قەری كار دكەت).
پرۆشە قەلەندەر دا زانین ژی، جورێن بازرگانیا ب مرۆڤان د سەردەمێ نوكەدا زۆرن و سەردابرنا سنێلەیان ب رێیا تۆڕێن كۆمەلایەتی ژی هەیە وەك بازرگانی ب مرۆڤان دهێتە هژمارتن، چونكە سنێلە دهێنە بكارئینان ب رێیا تۆڕێن جڤاكی یانژی ب رێیا یاریێن ئەلكترۆنی سۆز ب سنێلەیان دهێتە دان بڤێ رێكێ ناڤ و دەنگ ببن و گۆت: (هەروەسا كڕینا ئەندامێن لەشێ مرۆڤی هەمبەر كوژمەكێ كێم یێ پارەی دەلیڤە وەرگرتن ل رەوشا خراب یا ئابوریا مرۆڤی، زۆرترین بازرگانی ژی ل سەر دەمێ نوكەدا ب رێیا قەچاغ دهێتە كرن).
بێگومان هژمارەكا زۆر یا مرۆڤان ب گەهشتن ب وەلاتێن ئەورۆپا نەچارن رێكێن قەچاغ بكاربینن، قەچاغچی ئەڤێ رێكێ بكار دئینن بۆ مەرەمێن خوە، ژبەركو ئەو دزانن كەسێن بن دەستێ وان چو دەستهەلات نەماینە ڤەگەڕن بۆ وەلاتێ خوە و نەچارن زۆر كاران بكەن و گۆت: (لەوڕا ژی قەچاغچی دەستدرێژیا سێكسی دكەنە سەر مرۆڤان یان ژی زۆر جاران مادەیێن هۆشبەر ب رێیا وان مرۆڤان دەرباز دكەن، هەتا زۆر جاران پەنابەر دهێنە كوشتن و پارچەیێن لەشێ وان دهێنە فرۆتن، چەندین جورێن دی یێن بازرگانیێ ب مرۆڤان هەنە و گەهشتیە ئاستەكی دایك و باب هەمبەر كوژمەكێ پارەی زارۆكێن خوە بفرۆشن).
