بازرگانێن ههرێمێ پێدڤى رهوشهنبیریا بازرگانینه!
بازرگانیكرن د ناڤ جڤاكێ كوردی دا بۆ مێژوویهكا زۆر كهڤن دزڤریت ب حوكمێ وێ چهندێ كو دهڤهرێن كوردان دسنوورى بوون ئهڤجا چ دگهل عهرهبان یان توركان و فارسان، ئانكو كهلتورێ بازرگانیكرنێ ژمێژه یا د ناڤ كاروبارێن ژیانا خهلكێ كوردستانێ دا ههى. بهلێ شێواز و رێك و كهلوپهلێن بازرگانیكرنێ بهردام د هاتنه گوهارتن و ل دووڤ پێداویستیا ژیارا خهلكى و ب درێژیا مێژوویێ لڤینێن بازرگانى گهۆرینێن گهلهك مهزن و بهرچاڤ ب خوڤه دیتینه!
بهلێ پشتى ههلبژاتنێن سالا 1992 و دروستبوونا ئێكهم كابینا حكوومهتا ههرێمێ و ئیدارهكرنا چهندین دهروازێن سنوورى كهتینه دهستێن حكوومهتێ، وهكى ئیبراهیم خهلیل و حاجى ئومهران ل وى دهمى چهندین رێنما و ئاسانكارى و بۆ بازرگانان هاتنه دهركرن و دهرگهه بۆ بازرگانان ڤهبوون بۆ بازرگانیێ و ژوورێن بازرگانى دروست بوون و لڤینێن بازرگانى زۆر بهرفرههبوون تا سالا 2006 و دهركرنا یاسا وهبهرهێنانێ یا ژماره (4) ل وى دهمى تا نوكه بازرگانى و وهبهرهێنان ل ههرێما كوردستانێ چوو د قووناغهكا دی دا و زۆر پێشكهفت و بهرفرههبوو!.
سهرهرایى وان تێبینیێن ههین ل سهر یاسا وهبهرهێنانێ و پێرابوونێن حكوومهتێ و ژوورێن بازرگانى، بهلێ پشتهڤانیهكا ئێكجار مهزن بۆ بازرگان و وهبهرهێنهران هاتیه كرن و یا دئێته كرن! بهلێ پرسیار ل ڤێرێ بازرگانێن ههرێمێ شیاینه ب دروستى خزمهتا خهلكێ كوردستانێ بكهن و چهندهكا بچووك ژ قازانجا خوه گورى بهرژهوهندیا گشتى بكهن؟!!
یا خویایه كو تێكهلیێن بازرگانى و پهیوهندیێن كۆمپانیا و وهبهرهێنهرا یێن ناڤخۆ و بیانى گههشتینه ئاستهكێ زۆرێ مهزن و بهرفرهه، بهلێ دیسا مخابن تا نوكه بازرگان و وهبهرهێنهرێن مه نهشیاینه كهلتورێ خوه یێ بازرگانیكرنێ بگهۆرن و ب چاڤهكێ مهزن و ههستهكا نهتهوهیى تهماشهیهی بهرژهوهندیێن جڤاكێ خوه بكهن و تهماشهى خهلكى نهكهن وهك ژێدهرێ قازانچكرنێ!! یا ژ ههمیى گرنكتر ئهڤ تهخه نهشیاینه یان وهنهكریه كو چهند كۆمپانیایهكێن نیشتمانى دروست كهن و وهبهرهێنانێ ژ دهرڤهیى وهلاتى بكهن و پارهی ژ دهرڤه بینه ههرێمێ !! بهرۆڤاژى وێ چهندێ ههر ههمى پارێ خوه رهوانهی ژدهرڤه كریه! ئهڤجا چ ب رێكا حسابێن بانكى یان بازرگانیكرنا خهلهت! و ژ بلى قازانجێ هزر د چ تێشت دی دا ناكهن و هندى بشێن خوه ژ دانا باجێ ڤهدزن و لاوازیا حكوومهتێ وهكریه كو ئهڤ تهخا جڤاكى خوه زال بكهن ل سهر گهلهك سهكتهرێن ژیانا خهلكى!
ململانێ یا سهقهت و چاڤلێكرن د ناڤ ڤێ تهخێ دا وهكریه كو پارهكێ ئێكجار مهزن ب ههروه بچیت و مفا ژ نهئێته وهرگرتن و ههر ههمى تشتا و رهفتارا ئهڤ تهخه ب مافێ خوه دزانن و گهلهك دابونهریتێن سهقهت و خراب ئیناینه د ناڤ جڤاكێ مه دا! و قهد هزر نهكریه ئهگهر ل شینا دروستكرنا چهندین ڤێلا و مهزرهعا! و كرینا خانى و شوقا ل درڤهى وهلاتى وى پارهی ب ههڤشكى دگهل چهند بازرگان و وهبهرهێنهران چهندین كارگههێن جودا جودا و ل دووڤ پلانهكێ بدانن، چونكی ب ڤى رهنگى هزارهها دهرفهتێن كارى دا بۆ گهنجان ههكهڤن و ئهو ب خوه ژی دا مفایهكێ مهزن بینن و دا بارسڤكیهك بیت بۆ حكوومهتێ، بهلێ دیسا مخابن هزرا ب ڤى رهنگى ناكهن!.
لهورا دبێژین حكوومهت پێدڤى پلانهكا ستراتیجیا دومدرێژه و بازرگان و وهبههێنهر پێدڤى رهوشهنبیریا كاركرن و بازرگانیێنه و ههستكرن ب بهرپرساتیا نهتهوهیى و جڤاكى و كهلتورى!! و رێزێ ل یاسا و رێنمایا بگریت و حكوومهت دگهل ڤێ تهخا جڤاكى كار كهن بۆ دابینكرنا پێداویستیێن خهلكى ب گشتى و حكوومهتێ ب تایبهتى، چونكى نوكه ژ ههر دهمهكێ دى پتر خهلك و حكوومهت پێدڤى شیانێن ڤان بازرگان و وهبهرهێنهرانه بۆ دهربازكرنا ڤان قهیرانان و ڤێ قووناغا مهترسیدار تاكو دگههینه كنارێن ئازادیێ ل وى دهمى د یاسا و دهستوور ههر تشتهكى و مافهكى رێك دئێخیت و لوبیێن بازرگانى ئێدى نهشێن یاریا ب ژیار و پیداویستیا خهلكى بكهن!.
