بازێن چیای
خورشید تەوفیق باکۆزی
شەهید بژار..
جەنەرال و سەرلەشکرێن
شەڕێن گران
هەروەکو تە و شەهیدبوونێ
پێکڤە سۆزو ژڤان دابوو
دئۆغرێدا.
خوینا جانێ شەهید (لقمانی) ی و
(سەفەری) دگەل خوینا تە
ل یەک سەنگەری شەفەق دابوو.
خودانێن لۆگۆیێن زێرین.
بازێن چیا.. دوهی چیا بوون..
دوهی چارچەل و کەڤیێن بەفرێ و
باکێ هینێ زۆزانا بوون..
ژبەڕییا ژێری و کەسکا وێران
ددلگڕان بوون ..
ژبەرکو هەموودەمان لێ هاڤینە و
لێ پاییزە و دبێ بهارن..
دبێ کانیک و ئاڤێ سارن
ئاگرو فولکان ژێ دبارن
جه و وارێ هەوە نینە..
هەڤالینۆ.. چ بنڤیسم..؟
خامە ددەستێ مندا دقەڕسیت و
پەیڤ دهزرا مندا دسەتمن و
د درازینکا برینێدا
پڕ کەسەر و پڕی ژان دبن..
خەون دخەوەرۆژکا زێمارێدا
ژدووراتییا وە.. ژخەریبییا وە..
تیڕۆژکێن ڕۆژێ دهەلمیسن
بێهنا شۆپا وە هەدلکێشن
ژبێهنا شۆپا وە تێر نابن..
شاسوارێن ئازادییێ
ئازایەتی و قارەمانی و ناڤداریا وە
دناڤ فەرهەنگا ئازادیێدا
هێم و گرۆڤێن زیندینە.
چ جار نائێنە ژبیر کرن..
شەهیدینۆ..
تیڕۆژک و نۆرها ڕوومەتێ
ژ جان و جانگۆریا وە دوەشن
دناڤ دیرۆکا کوردینیێدا
رۆژا گەشن هەر دبشکوڕن.
دسەگەرێ کێفەراتێدا
هوون سەروەرن..
ددلێ گەلدا
دساخ وزیندینە.. نامرن
قەد نامرن..