باسكێت بۆلا دهۆكێ ڤەگەڕیا خولا ئیراقێ
قەیس وەیس:
ب شێوەكێ فەرمی فدراسیۆنا باسكێت بۆلا ئیراقێ پشككێشان بۆ وەرزێ نوو یێ خولا پلا دو ئەنجامدا ئەوا بڕیارە هەڤڕكیین وێ ب شێوەیی چار كۆم بۆ دەڤەرێن جودا ل ناڤەراستا مەها بهێت كۆمڤەبوون بۆ هەر كۆمەكێ بهێتە كرن.
ل دور ڤێ یەكێ د. خالد نەجم جێگرێ سەرۆك فدراسیۆنا باسكێت بۆلا ئیراقێ دیار كر پشتی كۆمبوونا تایبەت دگەل یانەیێن پشكدار بۆ وەرزێ نوو یا خولا پلا دو، بڕیار هاتە دان 16 یانە ل سەر چار كۆما بهێنە بەلاڤكرن و ب شێوەیی كۆمڤەبوون یاریێن وان بهێنە كرن ئەوا دێ ل دوو سیستەمێ خول ئێك قۆناغ بیت و هەر كۆمەكێ دێ دو یانە دەربازبنە قۆناغا دووڤدا كو ئەو قۆناغ ژێ بیتە دو كۆم، ئەوا خودانا رێزا ئێكێ دێ بەرانبەر خودانا رێزا دویێ یا كۆما دی بیت، د قۆناغا سێیێ دا تیمێن سەركەفتی دێ دەربازبنە یاریێن دووماهیێ و خوسارەت دێ بەرانبەر ئێك كەن بۆ دەستنیشانكرنا رێزێن سێیێ و چارێ.
هەروەسان ناڤهاتی گۆت: دەستپێكرنا وەرزێ نوو دێ ل 14-15-16ێ چریا دویێ یا بهێت بیت و ئەو یانەیێن پشكدار ل سەر چار كۆمان بڤی رەنگی هاتینە دانان، كۆما ئێكێ دێ ل هەولێرێ بیت ئەو ژی: شەقلاوە، ئارارات، جیهان و ئاسۆ، كۆما دویێ دێ ل كەركووكێ بیت ئەو ژی: شۆرچە، توركمان، سۆلاڤ و شەباب ئەلدبس، كۆما سیێیێ دێ ل سلێمانیێ بیت ئەو ژی، دهۆك، زانكۆیا سلێمانی، سامرا و ئەرمەن، كۆما چارێ دێ ل كەربەلا بیت ئەو ژی، ئەلحبایش، كەربەلا، ئەلرەوزەتین و بابل.
بۆ زانین تیما یانەیا دهۆك خودانا پێنج ناسناڤێن خولا پلا نایابا ئیراقێ یە ل سالێن 2009 هەتا 2014ێ، لێ ژبەر رەوشا دارایی یا خراب ل سالا 2018 خوە ژ خولێ ڤەكێشا، پشتی بۆرینا شەش سالان دۆبارە ڤەگەڕیا هەڤڕكیێن خولا ئیراقێ.
