باسكێت بۆلا زاخۆ ئه‌گه‌رێن ژ ده‌ست دانا چارگۆشا زێرین دیاركرن
ئه‌ڤرۆ، عه‌لی حاجی.
هاریكارێ راهێنه‌رێ تیما باسكێت بۆلا یانا زاخۆ دیاركر ژ ده‌ست دانا پلێتا ده‌ربازبوونێ بۆ چارگۆشا زێرین یا خولا پلا نایاب ئیراقێ ژبه‌ر چه‌ند ئه‌گه‌ران بوو ژوانا هنگاڤتن و نه بوونا یاریزانێ پێگهۆر.
زێده‌تر جوتیار عه‌لی بۆ رۆژناما ئه‌ڤرۆ گۆت: هه‌رچه‌نده ئارمانج و پلانێن مه بۆ ده‌ستڤه ئینانا پلێتا ده‌ربازبوونێ بۆ قۆناغا چارگۆشا زێرین یا خولا ئیراقێ بوو و تیما مه ئێك ژ بهێزترین یانێن خولێ دا لێ ئه‌و كارتیكرنێن ل سه‌ر كاروانێ تیمێ كرین و نه‌شیاین ده‌ربازبن ئه‌و هیڤی هه‌موو ژ ده‌ست دان ژوانا دووركه‌فتنا چه‌ند یاریزانێن مه هنده‌ك به‌ره ب ده‌رڤه‌یی وه‌لاتێ چوون و هنده‌ك هنگاڤتی بوون و هه‌روه‌سان ئه‌و یاریزانێ باش و شاره‌زا پێگهۆر نه‌بوو كو جهێ وان بگڕێت و چوونا وان ژی د ده‌مه‌كێ هه‌ستیار دا بوو كو ئه‌م تووشی چه‌ند ئاسته‌نگان كرین، د ده‌مێ نه‌بوونا یاریزانێ به‌رهه‌ڤ ڤالاتی په‌یدابوو و هه‌تا جهێ وان هاتیه گرتن چه‌ند ئه‌نجامێن نه چاڤه‌ڕێكری هاتنه تۆماركرن هه‌تا پشتی ب دووماهی هاتنا قۆناغا خولێ تیما مه رێزا شه‌شێ ب ده‌ستڤه ئینا ژ سه‌رجه‌مێ 13 یانێن هه‌ڤڕكی بۆ چار پلێتێن چارگۆشا زێرین.
ژلایه‌كێ دووڤه هاریكارێ راهێنه‌رێ زاخۆ پشته‌ڤانیا كارگێریا یانێ ب ده‌ستخووشی دا دیاركرن و گۆت: كارگێریا یانێ پشته‌ڤانیه‌كا مه‌زن ل تیمێ كر و هه‌مبه‌ری سالێن بوری باشتر بوو و هه‌ر داخوازیه‌كا مه ژ یانا خوه دكری لدووڤ شیانا بوو مه به‌رهه‌ڤ دكرن لێ ئاریشه یاریزانێن باش به‌رده‌ست نه‌بوون كو كارتیكرنا خوه ل سه‌ر ئاستێ تیمێ بكه‌ت، له‌ورا بۆ وه‌رزێ بهێت هه‌كه پشته‌ڤانی به‌رده‌وام بیت هه‌رزوو مه پلانه‌كا رێكخستی هه‌بیت و راهێنه‌رێ مه یێ سربی پێزانێن باش كۆمكرینه و كار بۆ به‌رهه‌ڤكرنا تیمه‌كا بهێز هێته كرن كو وه‌رزێ بهێت باسكێت بۆلا زاخۆ دێ هه‌ڤڕكیێ بۆ ناسناڤی كه‌ت.
