باسكێت بۆلا زاخۆ به‌رهه‌ڤه تێلێن كاره‌بایێ ب قه‌تینیت
ئه‌ڤرۆ، عه‌لی حاجی:
ب ئارمانجێن به‌رده‌وامیا سه‌ركه‌فتنان و پێشڤه چوونێ چاڤه‌ڕێ یه ئه‌ڤرۆ تیما باسكێت بۆلا یانا زاخۆ یاریه‌كا گرنگ و بهێز هه‌مبه‌ری خودانێن ئه‌ردی یانا كاره‌با یا به‌غدایی بكه‌ت ئه‌وا دێ ل هۆلا گرتیا شه‌عب ژ چارچووڤێ هه‌ڤڕكیێن گه‌ڕا حه‌فتێ یا خولا پلا نایابا ئیراقێ هێته كرن.
لدور دووماهی به‌رهه‌ڤیێن كوڕێن خابووری عه‌بدولستار عه‌لی سه‌رپه‌رشتێ تیمێ بۆ رۆژناما ئه‌ڤرۆ گوت: ئه‌ڤ یاریه گه‌له‌ك یا گرنگه و نه‌خشێ رێزبه‌ندیێ گوهۆریت ژبه‌ركو سه‌ركه‌فتنا مه دێ پێشڤه‌چوونه‌كا باش په‌یداكه‌ت و دوور ئێخیت ژ هه‌ر پێنچ یانێن دی ئه‌وێن هه‌ڤڕكیا مه دكه‌ن ژوانا یانا كاره‌با كو ئێك ژ تیمێن بهێزه و خودان یاریزانێن شیانن، به‌رهه‌ڤیێن مه گه‌له‌ك باشن و زاخا یاریزانان بلنده تایبه‌ت پشتی سه‌ركه‌فتنا به‌ری دو رۆژا ل سه‌ر یانا حلله ب جووداهیا خاله‌كێ كو ئه‌وژی تیمه‌كا هه‌ڤڕكه بوو مه، یاریا باسكێت بۆلێ هه‌تا چڕكێن دووماهیێ ئه‌نجامێ وێ دیار نینه دناڤبه‌را دو تیمێن ئاست و شیان نێزیكی ئێكبن، له‌ورا دێ هه‌تا دووماهی چڕكه شه‌ڕی بۆ سه‌ركه‌فتنێ كه‌ین.
هه‌روه‌سان ناڤهاتی دیاركر ئاریشا وان د كێماتیا یاریزانان دایه و گوت:ترسا مه هه‌رده‌مێ دو یاریزانێن زیره‌ك پێنچ فاولان وه‌ربكریت دێ كارتیكرنا خوه ل سه‌ر ئاست و شیانێن تیمێ كه‌ت، سه‌رباری وێ هه‌موو بزاڤا دكه‌ین لدووڤ شیانا ئاریشێن خوه چاره‌سه‌ربكه‌ین.
