باسكێت بۆلا زاخۆ ب ژڤانه بۆ سه‌ركه‌فتنا 13ێ
ئه‌ڤرۆ،
فۆتۆ: ئازاد زووم
دهێته چاڤه‌ڕێ كرن ئه‌ڤرۆ ل ده‌مژمێرچارێ ئیڤاری تیما باسكێت بۆلا یانه‌یا زاخۆ یاریا خوه یا 13ێ ژ چارچووڤێ هه‌ڤڕكیێن گه‌ڕا 20ێ خولا ئیراقێ ل گه‌ل یانه‌یا ته‌زامن ل باژێرێ نه‌جه‌ف ئه‌نجامبده‌ت و گه‌شبینه به‌رده‌وامیێ بده‌ته سه‌ركه‌فتنیێن خوه ژبۆ خوه نێزیكرن به‌ر ب چارگۆشا زێرین، بۆ زانین ل سه‌ر ئاستێ لاوان هه‌مان هه‌ردو یانه دێ ل ده‌مژمێر دو یێ پشتی نیڤرۆ یاریێ كه‌ن.
كورێن باژێرێ زاخۆ ئه‌وێن شیاین ژ17 یاریان 12 سه‌ركه‌فتنان بینن و 29 خالان كۆمبكه‌ت و رێزا شه‌شێ بهێن و دو یاری پاشخستی هه‌نه، ژلایێ خوه‌ڤه یانه‌یا ته‌زامن ژ 19 یاریان بتنێ دو سه‌ركه‌فتن هه‌نه و رێزا 13ێ و دووماهیێ دهێت.
ل دۆر به‌رهه‌ڤیێن تیما زاخۆ جوتیار عه‌لی هاریكارێ راهێنه‌رێ تیمێ بۆ رۆژناما ئه‌ڤرۆ گۆت: ئه‌م ژ ئاست و ئه‌نجامێن یاریزانێن خوه د رازینه و زێده‌تر گه‌شبینی په‌یداكریه كو ئه‌م هه‌ڤڕكیێ بۆ پلێتا ده‌ربازبوونێ به‌ر ب چارگۆشا زێرین بكه‌ین سه‌رباری پێنچ یاری ماینه بۆ ئێكلاكرنا پلێتێ، یاری بۆ یاری ئاست و هێزا تیما مه به‌ر ب باشتر دچیت، یاریا ئه‌ڤرۆ ل گه‌ل یانه‌یا ته‌زامنه ئێك ژ تیمێن ترسا داكه‌فتنێ دایه له‌وما دێ پری هه‌ڤڕكی بیت ژبه‌ركو ئه‌و تیم دێ بزاڤێن سه‌ركه‌فتنێ خوه قۆرتالكرنێ كه‌ت هه‌روه‌سان یاریگه‌ها وێ یا باش نینه ئانكۆ دێ كارتیكرنا خوه ل سه‌ر ئاستێ یاریزانان هه‌بیت، لێ مه باوه‌ری ب شیانێن وان هه‌یه كو دێ ل دووڤ پلانان به‌رده‌وامیێ ده‌ینه سه‌ركه‌فتنان، ئه‌م ناهێلین یاریزانێن مه هزرا سه‌ركه‌فتنێن بۆری بكه‌ت به‌لكو هه‌ر یاریه‌كا دهێته كرن بۆ مه دووماهیێ یه.
بۆ زانین هه‌تا نوكه تیما حه‌شد ئه‌لشه‌عبی ب 33 خالان سه‌رێ لیستێ دهێت و هه‌ر ئێك ژ شورته، نه‌فت، دیفاع ئه‌لجه‌ویه و دیجله رێزێن دویێ هه‌تا پێنجێ دهێن.
