باسكێت بۆلا زاخۆ دێ یاریێن هه‌ڤالینی ئه‌نجامده‌ت
ئه‌ڤرۆ،زاخۆ، عه‌لی حاجی
فۆتۆ: ئازاد زووم
د داخویانیه‌كێ دا سه‌رپه‌رشتێ تیما باسكێت بۆلا یانا زاخۆ بۆ رۆژناما ئه‌ڤرۆ دیاركر به‌رهه‌ڤیێن تیما وان به‌رده‌وامن و دێ چه‌ند یاریێن هه‌ڤالینی ئه‌نجامبده‌ت ژبۆ باشترین به‌رهه‌ڤی بۆ وه‌رزێ نوو یێ خولا پلا نایابا ئیراقێ.
زێده‌تر عه‌بدولستار عه‌لی دیاركر ئه‌وان داخوازا كه‌مپێ راهێنانێ ژ كارگێریا یانێ كربوو لێ ئێدی ده‌م د به‌رژوه‌ندیا وان دا نینه و دێ پشتبه‌ستنێ ل سه‌ر ئه‌نجامێن یاریێن هه‌ڤالینی كه‌ن و گۆت:د نوكه دا چو كیماسی دناڤ رێزێن تیمێ دا نینه تایبه‌ت پشتی هاتنا دو یاریزانێن پیشه‌ركار و ئێكێ ئیراقی و دێ بشێوه‌كێ باش به‌رهه‌ڤیا كه‌ین هه‌تا20ێ ڤێ هه‌یڤێ كو ژڤانێ ده‌ستپێكرنا خولا ئیراقێ یه و یا دشیان دا بۆ تیمێ دهێته كرن، هه‌روه‌سان یا گرنگ پرانیا یاریزانێن مه ده‌مه‌كێ درێژه ل گه‌ل ئێك یاریێ دكه‌ن و دزانن دێ چه‌وا ئاست و شیانێن خوه نیشان بده‌ن بتنێ یاریزانێن پیشه‌كار ئه‌وژی راهێنه‌ر كار ل سه‌ر دكه‌ت ل گه‌ل یێن یاریزانێن دی هه‌ماهنگی هه‌بیت كو بۆ وه‌رزێ نوو تیم ب هێزتر بیت.
ناڤهاتی ئه‌وچه‌نده ژی دیاركر پرانیا تیمێن پشكدار د خولێ دا ل پارێزگه‌ها دهۆكێ هاتینه كه‌مپێ راهێنانێ كو دێ بیته رێیه‌كا باش بۆ مه ئه‌م چه‌ند یاریێن هه‌ڤالینی ئه‌نجامبده‌ین و كار ل سه‌ر چاره‌سه‌ركرنا هه‌ر كێماسیه‌كێ بكه‌ین.
