باسكێت بۆلا زاخۆ ل كەركووكێ دێ شەڕی بۆ رێزێن پێشیێ كەت
بڕیارە سوبەهی پێنج شەمبی تیما باسكێت بۆلا یانەیا زاخۆ ل باژێرێ كەركووك بیتە مێڤانا یانەیا نەفت ئەلشیمال ژ چارچووڤەیێ هەڤڕكیێن گەڕا 13ێ یا خولا پلا نایابا ئیراقێ ئەوا دێ ل سەر ئاستێ پێشكەفتیان و لاوان ل هۆلا گرتییا بیلال هێنە كرن.
ل سەر ئاستێ پێشكەفتیان تیما زاخۆ دەمژمێر پێنجی ئێڤاری دێ یارییا خوە كەت ئەوا نوكە ژ 12 یارییان 20 خال هەنە ژ هەشت سەركەفتن و چار خوسارەتییان رێزا چارێ دهێت، هەرچەندە دەربازبوون بۆ چار گۆشەیا زێرین تا رادەیەكی باش مسۆگەر كرییە لێ دڤێ یاریێ دا دێ هەمی بزاڤان كەت دەربازبوونێ ئێكلا بكەت، د بەرانبەردا تیما نەفتێ بتنێ دو سەركەفتن هەنە و 10 خوسارەتی رێزا 11ێ دهێت ب 14 خالان لێ گوهۆڕینانا یاریزانان ئاستێ خوە باشترلێكرییە، ئەڤ یارییە بۆ كوڕێن خابووری یا گرنگە، ل سەر ئاستێ‌َ لاوان بڕیارە تیما زاخۆ ل دەمژمێر سێ ئێڤاری بەرانبەر تیما نەفت ئەلشیمال بیت.
ل دۆر ڤێ یاریی و دووماهی بەرهەڤیێن تیما زاخۆ جەگەر عەلی كاپتنێ تیمێ بۆ رۆژنامەیا ئەڤرۆ گۆت: یارییەكا ب سانەهی نابیت بەرانبەر تیمەكێ گوهۆڕینێن باش كرینە و دێ دناڤ ئەرد و جەماوەرێ خوە دا كەت، لێ تیما مە ژی بەرهەڤیێن گەلەك باش كرینە و هەمی یاریزان ب كادرێ راهێنانێ ڤە رژدن بۆ سەركەفتنێ و باشترین ئاست، هەرچەندە بۆ ڤێ یاریێ ژبەر هنگافتنێ دبیت پشكدار نەبم لێ مە كۆمەكا باش یا یاریزانان یێن هەین و دشێن جوداهیێ پەیدابكەن، پێنگاڤێن باش بۆ چارگۆشا زێرین هاتینە هاڤێـن.
