باسكێت بۆلا زاخۆ چاڤ ل سه‌ركه‌فتنا سێیێ یه
بڕیاره ئه‌ڤرۆ تیما باسكێت بۆلا یانه‌یا زاخۆ ل سه‌ر ئاستێ تازه‌پێگه‌هشتی و پێشكه‌فتیان د ناڤ ئه‌رد و جه‌ماوه‌رێ خوه دا مێڤاندارییا یانه‌یا ده‌ربه‌ندیخان بكه‌ت ژ چارچووڤه‌یێ یارییا خوه یا پێنجێ یا هه‌ڤڕكیێن خولا پیشه‌كارێن ئیراقێ، ئه‌وا دێ ل هۆلا گرتییا بنگه‌هێن وه‌رزشی ل باژێرێ زاخۆ هێته كرن.
ل سه‌ر ئاستێ تازه‌پێگه‌هشتییان تیما زاخۆ دێ ل ده‌مژمێر دو یێ پشتی نیڤرۆ مێڤاندارییا تازه‌پێگه‌هشتیێن ده‌ربه‌ندیخان كه‌ت، ل سه‌ر ئاستێ پێشكه‌فتیان بڕیاره پشتی یارییا تازه‌پێگه‌هشتییان ل ده‌مژمێر چارێ ئێڤار هه‌مان یانه مێڤان بكه‌ت.
د هه‌ر چار یاریێن بۆری یێن ل سه‌ر ئاستێ پێشكه‌فتیان تیما كوڕێن خابووری دو سه‌ركه‌فتن و خوساره‌تیه‌ك هه‌بوو، دگه‌ل شورته و كه‌رخ تووشی خوساره‌تیێ بوو، لێ ڤه‌گه‌ڕیا سه‌ركه‌فتنان و شیا به‌رانبه‌ر غاز ئه‌لشیمال و ئه‌لدیجله سه‌ركه‌فتنان بینت.
د داخویانیه‌كێ دا دلژار عه‌دنان سه‌رپه‌رشتێ تیما باسكێت بۆلا یانه‌یا زاخۆ بۆ رۆژنامه‌یا ئه‌ڤرۆ گۆت: د یاریێن بوری دا مە تێبینی ل سەر ئاست و ئەنجامێن تیما مە یا باسکێت بۆلێ ئەوا پشکدار د خولا پێشەکارێن ئیراقێ دا هەبوون ژبەر کو ئەو ئاست و ئەنجامێن دەستەیا کارگێریێ ژ وان چاڤەرێ دکر نە دهاتە دیتن، ژبەر هندێ مە ژ نێزیک ڤە دۆڤچوونا تیمێ کر و مە شیا خالا لاواز ببینن و هەر زوو چارەسەر کر و کاریگەریا وی کاری ژی د یاریا بەرامبەر غاز الشمال دا دیار بوو و ب ئاست و ئەنجام تیما مە شیا سەرکەڤتنا دویێ تومار بکەت و هەتا جەماوەری ب خوە ژی هەست ب گوهۆڕینان دکر دناڤ تیما مە دا، د یاریێن بهێت دا ئەم ل وێ باوەرێنە دێ ئاست و ئەنجامێن تیما مە گەلەک باش بن و دێ بەر ب رێزێن پێشیێ ڤە چیت.
ناڤبری گۆت ژی: هەر دیسان مە یاریزانێ خوە یێ وەرزێ بوری ئیساک دوبارە ڤەگەراندە دناڤ تیمێ دا و مە پێدڤی ب شیانێن وی هەبون و ئەو یاریزانە دێ پتر هاریکار بیت دگەل تیما مە.
