باسكێت بۆلا زاخۆ چاڤ ل سەركەفتنا ئێكی یە
قەیس وەیس:
جەماوەرێ یانەیا زاخۆ ب ژڤانن ئەڤرۆ پشتەڤانییا تیما باسكێت بۆلا یانەیا خوە ل هۆلا گرتییا بنگەهێ وەرزش و لاوان بكەت ئەوا بڕیارە دو یاریێن گەڕا دویێ ژ چارچووڤەیێ قۆناغا ئێكی یا خولا پلا نایابا ئیراقێ مێڤاندارییا یانەیا ئەلتیجارە یا بەغدایی بكەن.
ل سەر ئاستێ پێشكەفتییان كوڕێن خابووری ل دەمژمێر شەشی ئێڤاریەكا درەنگ ب ژڤانن بۆ سەركەفتنا ئێكێ و قەرەبوونا خوسارەتییا یارییا بۆری یا بەرانبەر یانەیا كەرخ بكەت ئەوا ل ئێكشەمبییا بۆری باژێرێ بەغدا هاتییە كرن تێدا یانەیا زاخۆ ب ئەنجامێ 104 خالان بەرانبەر 92 خالان تووشی خوسارەتیێ بووی، دڤێ یاریێ دا تیما زاخۆ دێ پشتگەرمیێ ب هەرسێ پیشەكارێن خوە یێن ئەمریكی پاۆلۆ واتسۆن، چاماری رۆبێرت و ماركۆس بۆریل، لێ یانەیا مێڤان ئەلتیجارە شیابوو سەركەفتنا ئێكێ بینت پشتی دگەل یانەیا دەربەندیخان نوونەرا دویێ یا كوردستانی و بئۆمێدە بشێت د ڤێ یاریێ دا خوسارەتیێ بگەهینتە یانەیا زاخۆ یا كوردستانی.
ل سەر ئاستێ تازەپێگەهشتییان بڕیارە تیما زاخۆ ل دەمژمێر چارێ ئێڤار ل هەمان هۆلا وەرزشی مێڤاندارییا یانەیا ئەلتیجارە بكەت، ژلایێ خوەڤە ژی تیما تازەپێگەهشتیێن زاخۆ نەشیابوون سەركەفتنێ بینن پشتی دگەل تازەپێگەهشتیێن كەرخ ب69 بەرانبەر 49 خالان خوسارەت بووین.
ژ یاریێن دی یێن ئەڤرۆ، شورتە- دەربەندیخان هۆلا ئەلشەعب ل بەغدا، غاز ئەلشیمال- كارەبا ل هۆلا كەركووك، دیجلە ئەلجامیعە- دیفاع ئەلجەوییە هولا ئەلشەعب.
بۆ زانین فەرمی 11 یانە د ناڤ لیستەیا وەرزێ نوو یا خولا پشەكاران دانە، ژ هەرێما كوردستانێ ب تنێ دو یانە پشكدارن ئەو ژی یانەیا زاخۆ و دەربەندیخان دگەل دا هەر ئێك ژ یانەیێن، حللە، غاز ئەلشیمال، كارەبا، شورتە، دیفاع ئەلجەوی، كەرخ، دیجلە ئەلجامعە، حەشد ئەلشەعبی و ئەلتیجارە، هەڤڕكیێن خولێ دێ هەتا 15ێ ئەیارا سالا 2025ێ بەردەوامبیت.
