باسكێت بۆلا كوردستانێ ڤه‌گه‌ڕیا چالاكیان
ئه‌ڤرۆ،زاخۆ، عه‌لی حاجی:
د داخویانیه‌كێ دا جێگرێ سه‌رۆكێ ئێكه‌تیا باسكێت بۆلا هه‌رێما كوردستانێ دیاركر بڕیاره ل ده‌ستپێكا چڕیا ئێكێ یا بهێت هه‌ڤڕكیێن وه‌رزێ نوو یێ خولا كوردستانێ بۆ یانه‌یێن پلا نایاب بهێته رێكخستن بتنێ حه‌فت یانه به‌رهه‌ڤیان خوه دیاركرینه.
زێده‌تر هشیار دۆبانكی بۆ رۆژناما ئه‌ڤرۆ گۆت: ل دووڤ بڕیارا ئێكه‌تیا باسكێت بۆلا كوردستانێ ژڤانه ل ده‌ستپێكا هه‌یڤا بهێت هه‌ڤڕكیێن وه‌رزێ نوو یێ پلا نایاب بهێته ئه‌نجامدان ب پشكداریا حه‌فت یانا ئه‌و ژی زاخۆ، ده‌ربه‌ندیخان، ئه‌كه‌د، هێرش، قه‌لا، سۆلاڤا نوو و ئاسۆ ئه‌وا ل دێ دووڤ شێوازێ خول ئێك قۆناغ هێته برێڤه‌برن، هه‌روه‌سان ل سه‌ر ئاستێ تازه‌پێگه‌هشتیان و دووڤدا ئاستێ لاوان هێنه ئه‌نجامدان ئه‌وێن دێ ب شێوێ كۆمڤه بن و پێشنیار هاتیه كرن قاره‌مانیه‌ك ل باژێرێ زاخۆ بیت و یا دویێ ل باژێرێ سلێمانیێ بیت، یانا زاخۆ به‌رهه‌ڤیا خوه دیاركریه بۆ مێڤانداریا قاره‌مانیه‌كێ، هه‌روه‌سان د پرۆگرامێ چالاكیێن ئێكه‌تیێ دا ئه‌نجامدانا قاره‌مانیا باسكێت بۆلێ ل سه‌ر ئاستێ كچان دا بهێته كرن ب شێوێ كۆمڤه‌بوون و باژێرێ هه‌ولێرێ بۆ ڤێ قاره‌مانیێ هاتیه ده‌ستنیشانكرن و گۆت: هه‌كه ده‌م ل به‌رده‌ست هه‌بیت دێ ل سه‌ر ئاستێ پلا ئێك یا خولا كوردستانێ هێته رێكخستن.
ژلایه‌كێ دووڤه ناڤهاتی ئه‌وچه‌نده ژی دیاركر بۆ ئینانا یاریزانێن پیشه‌كار ل دووڤ رێنمایان هه‌ر یانه‌كێ مافێ هه‌یی ب تنێ ئێك یاریزانێ ده‌رڤه‌یی هه‌رێمێ بینت كو ره‌كه‌ز عه‌رب دهێته هژمارتن پیشه‌كار و مه پێشنیار ژی هه‌یه نه بتنێ پیشه‌كار عه‌ره‌ب بیت به‌لكو یێ بیانی ژی بیت.
